Shugaba Bola Ahmed Tinubu ya amince da naɗin Lamiɗo Abubakar Yuguda a matsayin Mataimakin Gwamnan Babban Bankin Nijeriya (CBN), sai dai naɗin zai fara ne bayan Majalisar Dattawa ta tabbatar da shi.
Mai Ba Shugaban Ƙasa Shawara kan Harkokin Yaɗa Labarai da Tsare-tsare, Bayo Onanuga, ya faɗa a cikin wata sanarwa a yau Laraba cewa an yi wannan naɗi ne bisa tanadin Sashe na 8(1) na Dokar Babban Bankin Nijeriya ta shekarar 2007.
Naɗin Yuguda ya biyo bayan naɗin tsohon Mataimakin Gwamnan CBN, Bala Bello, a matsayin Mai Ba Shugaban Ƙasa Shawara na Musamman kan Tattalin Arziki da Siyasa.
Tinubu ya buƙaci sababbin masu riƙe da muƙaman da su gudanar da ayyukan su cikin ƙwazo, ƙwarewa da sadaukarwa domin tabbatar da daidaiton tattalin arzikin Nijeriya da kuma bunƙasa shi.
Shi dai Lamiɗo Yuguda, ya taɓa riƙe muƙamin Daraktan Janar na Hukumar Kula da Kasuwar Hadahadar Kuɗi ta Nijeriya (SEC) daga 2020 zuwa 2024.
Yuguda ya kammala karatun sa a Jami’ar Ahmadu Bello (ABU) Zariya inda ya samu digirin BSc a fannin Akanta a 1983. Daga bisani ya samu digiri na biyu (Master’s) a fannin Money, Banking and Finance daga Jami’ar Birmingham da ke Birtaniya a 1991.
Shi memba ne na Cibiyar Ƙwararrun Akantoci ta Nijeriya (ICAN) kuma yana da shaidar ƙwararrun masu nazarin jarin kasuwa ta CFA.
Yuguda ya fara aikin sa ne a Babban Bankin Nijeriya (CBN) a cikin 1984 a matsayin Babban Mai Kulawa (Senior Supervisor) a Sashen Ayyukan Kuɗaɗen Ƙasashen Waje.
A 1997 ya shiga Asusun Ba da Lamuni na Duniya (IMF) a matsayin masanin tattalin arziki a sashen Afrika, inda ya yi aiki har zuwa 2001 kafin ya koma CBN.
Ya yi ritaya daga CBN a 2016 bayan ya yi shekaru shida a matsayin Daraktan Sashen Kula da Ajiyar Kuɗaɗen Ƙasa (Reserve Management Department).
