Shugaba Bola Ahmed Tinubu ya aika Mataimakin sa, Kashim Shettima, zuwa Jihar Kebbi a ranar Laraba domin jajanta wa gwamnatin jihar da iyayen ’yan matan da aka sace daga Makarantar Sakandaren ’Yan Mata ta Maga, tare da tabbatar masu da cewa gwamnati na aiki tuƙuru don ganin an kuɓutar da su cikin gaggawa.
A cikin sanarwar da mai ba shugaban ƙasa shawara kan harkokin yaɗa labarai da dabaru, Bayo Onanuga, ya fitar, shugaban ya jajanta wa rundunar sojin Nijeriya bisa rasuwar sojoji da kuma Birgediya Janar Musa Uba, waɗanda ‘yan ta’adda suka halaka a Jihar Borno.
Tinubu, wanda aka bayyana cewa an yi masa cikakken bayani kan harin da ya yi sanadin sace ’yan makarantar da kuma harin da ya hallaka sojojin, ya nuna matuƙar damuwa kan faruwar al’amurran.
Shugaban ya yi Allah-wadai da harin, yana mai kira ga al’ummomi, musamman a yankunan da ke fama da matsalolin tsaro, da su riƙa ba hukumomin tsaro bayanan sirri don taimaka masu wajen kare rayuka da dukiyoyin jama’a.
Ya ce hukumomin tsaro ba za su iya yin aiki yadda ya kamata ba matuƙar ba su samun goyon baya da bayanai daga al’ummar yankunan da suke aiki.
