Shugaba Bola Ahmad Tinubu ya taya tsohon Shugaban jam’iyyar APC na Ƙasa, kuma abokin siyasar sa, Dakta Abdullahi Umar Ganduje, murnar zagayowar ranar haihuwar sa da yake yi yau Alhamis.
Ganduje ya cika shekaru 76 da haihuwa a yau.
A cikin wata sanarwa da mai ba Shugaban ƙasa shawara kan harkokin yaɗa labarai da dabaru, Bayo Onanuga ya fitar, Shugaba Tinubu ya bayyana Ganduje a matsayin gogaggen ɗan siyasa kuma ƙwararren mai gudanar da mulki, wanda ya shafe kusan rabin ƙarni yana bai wa ƙasa hidima a fannoni da dama.
Shugaban ya bayyana cewa Ganduje ya fara taka rawa tun a Gwamnatin Tarayya, inda ya yi aiki a matsayin babban jami’in gudanarwa a Babban Birnin Tarayya, Abuja, kafin daga bisani a kira shi Kano inda ya zama Kwamishinan Ayyuka a lokacin mulkin soja.
Kazalika, ya tuna cewa Ganduje ya yi mataimakin gwamnan Kano na tsawon wa’adi biyu, sannan daga bisani ya zama gwamnan jihar, inda ya yi shekaru takwas yana jagorancin Kano.
Yanzu kuma yana riƙe da kujerar Shugaban Hukumar Kula da Filayen Jiragen Sama ta Ƙasa (FAAN).
Tinubu ya ce: “Ina alfahari da zumunci da haɗin kai tsakanin mu tun tsawon shekaru, da irin gudunmawar da ya bayar ga jam’iyyar APC.
“Ina roƙon Allah ya ƙara masa lafiya da nisan rai domin ci gaba da hidima ga Nijeriya da bil’adama.”
Sanarwar ta ƙare da taya shi murna tare da fatan alheri a cikin sabuwar shekarar rayuwar da ya samu.
