Fadar Shugaban Ƙasa ta musanta wani labari na ƙarya da ke yawo a soshiyal midiya cewa wai Shugaba Bola Ahmed Tinubu ya sauya Shugaban Ma’aikatan Fadar sa (Chief of Staff), Hon. Femi Gbajabiamila, da Babban Sakataren Sirrin sa (Principal Private Secretary), Hakeem Muri-Okunola.
A cikin wata sanarwa da Mai Ba Shugaban Ƙasa Shawara na Musamman kan Harkokin Yaɗa Labarai da Tsare-tsare, Bayo Onanuga, ya saki a yau, Fadar ta bayyana cewa babu wata gaskiya ko kaɗan a cikin wannan iƙirari, tare da kira ga ’yan Nijeriya da su yi watsi da labarin gaba ɗaya.
Sanarwar ta jaddada cewa Gbajabiamila na nan daram a matsayin Shugaban Ma’aikatan Fadar Shugaban Ƙasa, yayin da Muri-Okunola shi ma ke ci gaba da gudanar da aikin sa, ta ce babu wani sauyi da aka yi a waɗannan muƙamai.
Fadar ta bayyana cewa labarin da ke yawo ƙirƙirarre ne daga wasu masu yaɗa labaran ƙarya da nufin su shi ne tayar da zaune tsaye da rashin jituwa a cikin gwamnati.
Haka kuma ta sake jan hankalin kafafen yaɗa labarai da masu amfani da kafafen sada zumunta da su rika tantance sahihancin duk wani bayani kafin wallafawa ko yaɗawa.
