Shugaban Ƙasa Bola Ahmed Tinubu ya zaɓi waɗanda za su zama jakadu domin wakiltar Nijeriya a ƙasashe uku – Amurka, Birtaniya da Faransa.
Mutanen da ya zaɓa ɗin su ne Ambasada Ayodele Oke, Laftanar Kanar Lateef Kayode Are (ritaya), da Ambasada Amin Mohammed Ɗalhatu.
Wata sanarwa da Mai Ba Shugaban Ƙasa Shawara na Musamman kan Labarai da Tsare-tsare, Bayo Onanuga, ya fitar ta ce Ambasada Amin Mohammed Ɗalhatu ya taɓa zama Jakaden Nijeriya a Koriya ta Kudu a zamanin Shugaba Buhari, bayan an naɗa shi a 2016.
Ambasada Ayodele Oke, wanda ya kammala karatu a Jami’ar Emory da ke Atlanta, Amurka, tsohon Darakta-Janar ne na Hukumar Leken Asiri ta Ƙasa (NIA), sannan ya taɓa zama Jakaden Nijeriya a Ƙungiyar Kwamanwal (Commonwealth) da ke Landan.
Shi kuwa Laftanar Kanar Lateef Kayode Are (mai ritaya) ya kasance Darakta-Janar na Hukumar Tsaro ta SSS daga 1999 zuwa 2007, ya kuma yi aiki a matsayin Mai Bai wa Shugaban Ƙasa Shawara kan Tsaron Ƙasa a 2010, tare da yin aiki a Sashen Leƙen Asiri na Soji.
Ya kammala karatu da sakamako na Ajin Farko (First Class) a fannin Ilimin Halayyar Ɗan’adam (Psychology) a Jami’ar Ibadan a 1980.
Onanuga ya ce za a kammala tura su ofis ne bayan tantancewar Majalisar Dattawa.
