Ministan Yaɗa Labarai da Wayar da Kai, Alhaji Mohammed Idris, ya ce aikin babbar hanyar Sakkwato zuwa Badagiri mai tsawon kilomita dubu zai taimaka wajen bunƙasa noma da buɗe sababbin damar tattalin arziki ga al’ummomi da jihohin da hanyar za ta ratsa, ciki har da Jihar Kebbi.
Idris ya bayyana haka ne a Abuja lokacin da tawagar masu yaɗa labarai na Gwamnatin Jihar Kebbi, ƙarƙashin jagorancin Kwamishinan Yaɗa Labarai na jihar, Alhaji Yakubu Birnin-Kebbi, ta kai masa ziyarar ban-girma.
Ya ce kusan kilomita 250 daga cikin hanyar za ta ratsa ta cikin Kebbi ne, wanda hakan zai bai wa jihar damar ƙara faɗaɗa harkokin noma, kasuwanci da sauran ayyukan tattalin arziki.
Ministan ya ce aikin ba wai hanya ce kawai ta haɗa garuruwa da jihohi ba, domin ana sa ran samar da madatsun ruwa kusan 63 a kan layin hanyar, waɗanda za su taimaka wajen bunƙasa noma, samar da wutar lantarki da sauran ayyukan tattalin arziki.
Ya yaba wa gwamnatin Kebbi kan haɗin gwiwar da take yi da Gwamnatin Tarayya a fannonin noma, ababen more rayuwa da tsaro.
Ya ce irin waɗannan manyan ayyukan more rayuwa suna daga cikin ƙoƙarin Shugaba Bola Ahmed Tinubu na kai cigaba kusa da jama’a, tare da samar da yanayin da zai bai wa ‘yan kasuwa da al’umma damar bunƙasa.
A cewar sa, yawancin al’ummar Najeriya suna zaune ne a jihohi, ba Abuja ba, don haka ya zama wajibi a kai cigaba inda suke.
A nasa jawabin, Kwamishinan Yaɗa Labarai na Kebbi ya ce tawagar ta je Abuja ne domin gabatar wa ministan da bayanai kan nasarorin da gwamnatin jihar ta samu tare da ƙarfafa alaƙar ta da Gwamnatin Tarayya.
Ya ce Kebbi tana da babbar dama a fannonin noma, ilimi, lafiya, ababen more rayuwa da tsaro, kuma jihar tana so ta ci gaba da haɗa hannu da Gwamnatin Tarayya domin amfani da wannan damar wajen bunƙasa tattalin arzikin jihar.
