Gwamna Mohammed Umaru Bago na Jihar Neja ya ƙara bayyana dalilan tilasta wa malamai da limamai na Musulunci da Kirista karɓar lasisin tantancewa da amincewar gwamnati kafin su yi wa’azi da huɗubobi a masallatai da coci-coci a faɗin jihar.
Ya ce lallai tilas kafin kowane limami ya hau mumbari ya yi huɗuba a ranar Juma’a, sai ya fara damƙa kwafen huɗubar domin hukuma ta tantance kafin ranar.
Hakan na ƙunshe cikin ƙarin hasken da ya yi a wata tattaunawa da gidan talbijin na TVC ta yi da shi a jiya Lahadi.
Bago ya ce gwamnatin sa ta fito da wannan doka ne domin tabbatar da cewa wa’azoji da huɗubobin malamai ba su zama musabbabin tayar da hargitsi ko ruruta baƙar adawa da gwamnati da sunan wa’azi ba.
Ya ce: “Ban hana kowa yin wa’azi ba. Amma dai duk limamin da zai yi huɗuba a masallacin Juma’a, to ya fara kawo kwafen huɗubar a tantance kafin ranar tukunna. Wannan kuwa shi ne daidai, domin ko a Saudiyya hakan ake yi.
“Bai fa yiwuwa don kawai ka samu damar zama malami ko limami, sai ka fita kana surfa maganganun da ka iya haddasa fitina, ko ka buɗe babin rigima da gwamnati. Kuma wai kai gani kake daidai ne.”
Da aka tambaye shi ko hakan na da nasaba da damuwar da ake yi kan masu yaɗa munana da tsauraran aƙidu a cikin al’umma, sai ya ce, “Ƙwarai kuwa, wannan ne dalilin. Muna so mu riƙa sanin abin da suke wa’azi a kai, mu riƙa sauraron abin da suke faɗa. Kuma muna aiki tare da jami’an tsaro na DSS, ‘yan sanda, NSCDC har ma da sojoji.”
Tuni dai Babban Daraktan Harkokin Addini na Jihar Neja, Umar Farooq, ya bada sanarwa cewa duk wanda ke so ya yi wa’azi a Jihar Neja, sai ya yanki lasisin tantancewa da amincewa tukunna.
Ya ce wa’adin karɓar lasisin zai ƙare nan da watanni biyu, lokacin da dokar za ta fara aiki gadan-gadan.
