Gwamnatin Tarayya ta ce tana ƙoƙarin faɗaɗa Shirin Ciyar Da ‘Yan Makaranta Daga Gida na Ƙasa (National Home-Grown School Feeding Programme, NHGSFP) ta yadda za a riƙa ciyar da ɗalibai miliyan 50 a cikin shekara mai zuwa ta 2026.
Babbar Manajar Cibiyar Inganta Rayuwa ta Ƙasa (National Social Investment Programme Agency, NSIPA), Dakta Aderemi Adebowale, ita ce ta bayyana haka a hirar ta da Hukumar Dillancin Labarai ta Nijeriya (NAN) a Abuja.
Ta ce: “Muna ƙoƙarin haɗawa da yara masu ƙananan shekaru – firamare 1 zuwa 3, firamare 4 zuwa 6 – a shirin ciyar da ‘yan makaranta, da ma yaran da ba su zuwa makaranta, wanda muke yi mataki-mataki don mu haɗa komai.
“Saboda haka, ya zuwa shekara ta 2026, muna hangen za mu riƙa ciyar da kusan ‘yan makaranta miliyan hamsin a makarantun firamare a Nijeriya.
“In da so samu ne, kamata ya yi ciyar da ‘yan makaranta ya zama tsakanin N500 zuwa N1,000 kan kowane yaro.
“Ko da a N500 kan kowane yaro ne, ya kamata ka iya ba yaran abinci mai Gina jiki kuma mai daɗi a kowace rana.”
Adebowale ta ƙara da cewa ta samu iyakance farashi ta hanyar yin haɗaka da ƙananan manoma, da masu dubawa, da tsarin kai abincin, da abokan hulɗa masu sa ido.
“Da wannan haɗakar, za mu iya iyakance farashin ya zama mafi ƙanƙanta. Ba za mu riƙa amfani da farashin kasuwa ba.
“Saboda haka, sai mun amince da farashin daga ‘yan kwangila, da masu sayarwa, da manoma har mu cimma farashi mai rahusa na kowane kwanon abinci. Da zarar mun yi hakan, sai mu ɗora da biyan kuɗi da kuma kawo kayan.”
A ranar 27 ga Mayu, 2025 ne dai Gwamnatin Tarayya ta ƙaddamar da shirin “Alternate Education and Renewed Hope National Home-Grown School Feeding Project,” wanda manufar sa ita ce a samar da abinci ga yaran da ba su zuwa makaranta da masu samun ƙarancin abinci har miliyan 20 ya zuwa shekara ta 2026.
Ministan Jinƙai da Rage Fatara na lokacin, Farfesa Nentawe Yilwatda, shi ne ya ƙaddamar da shi a Abuja.
A yanzu shi Yilwatda shi ne Shugaban jam’iyyar APC na Ƙasa.
