Hukumar Yaƙi da Cin Hanci da Rashawa ta Tattalin Arziki (EFCC), a yau Litinin ta gurfanar da Giɗaɗo Ibrahim da Halimat Adenike Tejusho (wadda ta gudu ta ɓoye) a gaban Mai Shari’a H. Mu’azu na Babbar Kotun Babban Birnin Tarayya (FCT), da ke Maitama, Abuja, kan zargin damfarar samun aiki har naira miliyan 600.
An gurfanar da su kan gyaran tuhume-tuhume guda shida da suka shafi zamba, karɓar kuɗi ta hanyar yaudara da kuma jabun takardu, har zuwa adadin N603,400,000.00 (Naira miliyan ɗari shida da uku da dubu ɗari huɗu).
A zaman kotun na yau, lauyan masu gabatar da ƙara, Y. Tarfa, ya ja hankalin kotu kan gyaran tuhume-tuhume guda shida, inda ya roƙi kotun da ta ba wanda ake zargi damar amsa laifin.
Tuhuma ta farko ta ce: “Kai, GIƊAƊO IBRAHIM da HALIMAT ADENIKE TEJUSHO O (wadda ta gudu a halin yanzu), tsakanin watan Agusta 2024 zuwa Oktoba 2024 a cikin hurumin wannan kotu mai daraja, kun karɓi kuɗi har N603,400,000.00 (Naira miliyan ɗari shida da uku da dubu ɗari huɗu) daga OLUSEYE YOMI-SHOLOYE, ta hanyar yaudara da cewar za ku taimaka mata ta zama Manajan Darakta Janar (GMD) ta Kamfanin Man Fetur na Ƙasa (NNPC), alhali kun san wannan magana ƙarya ce. Ta haka kun aikata laifi da ya saɓa wa Sashe na 1(a) na Dokar Damfarar Kuɗin Gaisuwa (Advance Fee Fraud) da Sauran Laifuffukan da suka Shafi Zamba ta 2006, wanda ake hukunta shi a ƙarƙashin Sashe na 1(3) na dokar.”
Tuhuma ta biyu kuma ta ce: “Kai, GIDADO IBRAHIM, a watan Agusta 2024 a Abuja, a cikin hurumin wannan kotu mai daraja, ka yi amfani da wata takarda ta jabu mai taken ‘Presidential Villa State House, OFFICE OF THE NATIONAL SECURITY ADVISER’ a matsayin sahihiya, alhali ka sani ko kuma ya kamata ka sani cewa takardar jabun ce. Ta haka ka aikata laifi da ya saɓa wa Sashe na 366 na Dokar Final Kod, wanda ake hukunta shi a ƙarƙashin Sashe na 364 na dokar.”
Wanda ake tuhumar dai ya musanta dukkan tuhume-tuhume guda shida lokacin da aka karanta masa su.
Bayan ya musanta laifin, sai lauyan masu gabatar da ƙara, Tarfa, ya roƙi kotu da ta sanya ranar fara shari’a tare da bayar da umurnin tsare wanda ake tuhuma a gidan gyaran hali.
Sai dai lauyan wanda ake tuhuma, B.B. Alhaji, ya sanar da kotu cewa ya shigar da takardar neman beli, yana mai cewa ko da yake ba a kai ga sauraron ta ba tukuna, ya kamata a tsare wanda ake tuhuma a hannun EFCC idan an yi la’akari da yanayin lafiyar sa, har zuwa ranar sauraro da yanke hukunci kan neman belin.
Mai Shari’a Mu’azu ya ɗage shari’ar zuwa ranar 17 ga Fabrairu, 2026 domin sauraron buƙatar belin, tare da bayar da umurnin a tsare wanda ake tuhuma a Gidan Gyaran Hali na Kuje.
