Naira ta ci kasuwar ƙarshen watan Oktoba tare da samun galabar naira 15.33 kan dalar Amurka, a ranar 31 ga Oktoba.
Naira ta samu wannan tagomashin na Naira 15.33 a ranar Juma’a kan dala a kasuwar ‘yan canji da kuma Hada-hadar Musayar Kuɗaɗe ta bai-ɗaya (NAFEM).
A Abuja dai an sayar da dala 1 kan N1,450, yayin da masu canji suka saya kan Naira 1440.
An samu rangwame idan aka kwatanta da yadda aka sayi dala kan N1,465 a ranar Alhamis.
Masu lura da kuma sharhi kan tattalin arzikin ƙasa da hada-hadar kuɗaɗe sun danganta wannan gwauron numfashi da naira ta yi da irin ƙoƙarin da CBN yake kan yi wajen saisaitawa da daidaita farashin musayar kuɗaɗe.
