* Tasirin Ɗangote da Abdussamad Rabi’u A Duniya
* Me Ya Sa Babu Ƙabilar Ibo A Jerin Attajiran Afrika Da Duniya Baki Ɗaya?
* Ɗangote: Bahaushen Da Mutum 82 Kaɗai Suka Fi Shi Ƙarfin Arziki A Duniya
*Abdussamad Rabi’u: Bahaushen Da Bayarabe Ɗaya Ne Ya Fi Shi Ƙarfin Arziki
Mujallar Forbes ta watan Afrilu, 2025 ta fito da sabon jadawalin attajiran duniya, su 3,028. A cikin bayanin da mujallar ta yi, ta bayyana cewa ta yi amfani da ma’aunin darajar Dalar Amurka a kasuwar hada-hadar canji ta ranar 7 ga Maris, 2025, inda ta auna ƙarfin arzikin kowanen su a Mizanin Hada-hadar Hannayen Jari a duniya.
New Citizen Hausa ta bi diddigin jadawalin waɗannan manyan attajirai su 3,025, inda ta zaƙulo waɗansu muhimman bayanai kamar haka:
1. Aliko Ɗangote shi ne mutum na 83 a jerin manyan attajirai na duniya, daga cikin mutum sama da biliyan 8 da miliyan 221 da ke raye a duniya, a ƙididdigar ranar 13 ga Maris, 2025.
2. Ɗangote shi ne baƙar fatan da ya fi kowane baƙar fata ƙarfin arziki a duniya.
3. Ƙarfin arzikin Ɗangote ya kai Dala biliyan 23.9, ko a ce Dala biliyan 24 a ƙiyasi.
4. Ɗangote shi ne mafi ƙarfin arziki a Afrika da Afrika ta Yamma.
5. Shekara 14 kenan a jere Ɗangote na riƙe da kambun mafi ƙarfin arziki a Afrika da cikin baƙaƙe na duniya bakiɗaya.
6. Ƙarfin arzikin Ɗangote ya nunka arzikin Yarabawa biyu masu ƙarfi a Afrika har sau uku da ɗoriya.
7. Abdussamad Rabi’u (BUA), shi ne na 3 a ƙarfin arziki a Najeriya, na 7 a jerin baƙaƙe na duniya, kuma na 6 na Afrika.
8. Ƙarfin arzikin Abdussamad BUA ya kai Dala biliyan 5.1 a ƙididdigar Forbes ta 2025.
9. Ɗangote ya ninka Abdussamad ƙarfin arziki har ninki huɗu.
10. Ƙididdigar Forbes dai na nufin babu wani ɗan ƙabilar Igbo ƙasaitaccen attajirin da ƙarfin arzikin sa ya kai ko ya haura darajar dala biliyan ɗaya.
11. Ƙididdigar ta nuna babu ɗan ƙabilar Igbo ko ɗaya a jerin manyan attajiran Afrika 20.
12. Wannan ƙididdiga ta nuna babu ɗan ƙabilar Igbo a jerin attajirai baƙar fata su 23 na duniya.
13. Attajirai huɗu ne kacal daga Najeriya waɗanda ke cikin jerin attajirai na duniya. Su ne Aliko Ɗangote, Mike Adenuga, Abdussamad Rabi’u da Femi Otedola. Wato Bahaushe biyu, Bayarabe biyu.
14. Ƙididdigar Forbes dai na nufin a ƙabilar Igbo babu mai ƙarfin arzikin mawaƙiyar nan ‘yar rawar kwambilo, wato Rihanna, wadda ke da Dala biliyan 1 da miliyan 400.
15. Daga cikin waɗannan attajirai 3,028 na duniya, 902 a Amurka suke. Sai Chana da Hong Kong 512. Indiya kuma 205.
16. A 1987, shekarar da Forbes ta fara wannan ƙididdigar, biloniyoyi 140 kaɗai aka samu a duniya. Bayan shekaru 20 kuma an samu biloniyoyi 1,000 a 2007.
17. Tsakanin 2007 zuwa 2017 adadin attajiran sun ƙaru zuwa mutum 2000.
18. Daga 2017 kuma zuwa 2025, adadin ya kai 3,028.
19. Cikin 2025 an samu ƙarin attajirai masu sama da Dala biliyan 1 har mutum 285 a duniya.
20. Ƙarfin arzikin Ɗangote ya kusa ninkawa ne a cikin 2025, albarkacin Matatar Ɗangote da ya gina a Legas.
21. A ƙididdigar 2024 ƙarfin arzikin Ɗangote ya na Dala biliyan 13.4 ne. An haɗa da matatar sa ce ya koma Dala biliyan 23.9 a 2025.
22. Elon Musk shi ne mafi ƙasaitar arziki a duniya, mai ƙarfin Dala biliyan 342.
23. Forbes ta jinjina wa Ɗangote wajen juriyar da ya nuna har ya gina katafariyar matatar man fetur, wadda ita ce ta bakwai a girma a duniya.
24. “Inda Ɗangote ya fi bada mamaki shi ne yadda ya kwashi tulin yashi daga cikin teku mai yawan ‘cubic’ miliyan 365, ya gina tashar jiragen ruwa tasa ta kan sa, don amfanin matatar sa,” cewar Forbes.
25. Ƙididdigar Forbes ta nuna ba a samun ƙasaitaccen attajiri a cikin manyan masu riƙe da muƙaman gwamnati, sai dai a samu ƙasurgumin ɓarawo.
* Abin Lura: Duk dala biliyan 1 ta haura naira tiriliyan 1 da rabi.
