Gwamnatin Tarayya, ƙarƙashin shirin nan na Shugaban Ƙasa kan Iskar Gas da motoci masu lantarki (Pi-CNG & EV), ta ƙulla wata yarjejeniya da manyan hukumomin kuɗi domin sauƙaƙa wa ‘yan Nijeriya hanyoyin samun bashi don sauya injinan motocin su daga masu amfani da fetur da dizil zuwa gas (CNG) da wutar lantarki.
Yarjejeniyar, wadda aka rattaba wa hannu a birnin Abuja, ta haɗa da shirin Pi-CNG & EV, da hukumar CrediCorp mai bayar da bashi ga masu sayayya, da kamfanin NCGC mai ba da tabbacin kuɗi, da kuma bankin Moniepoint.
Wannan shiri na Pi-CNG & EV yana ɗaya daga cikin manyan ayyukan gwamnatin Shugaba Bola Ahmed Tinubu a ƙarƙashin tsarin Renewed Hope, da nufin haɓaka amfani da makamashi mai tsafta, rage tsadar man fetur, da kuma rage gurɓatar yanayi a faɗin kasar nan.
Babban maƙasudin wannan haɗaka shi ne samar da tsari inda masu motocin ƙashin kan su, direbobin haya, da masu manyan motocin sufuri za su iya samun tallafin kuɗi cikin sauƙi domin biyan kuɗin sauya injinan motocin su ba tare da fuskantar matsin tattalin arziki ba.
A cewar jami’an gwamnati, wannan mataki na zuwa ne a daidai lokacin da farashin man fetur ke ci gaba da tashi, inda aka kalli sauya injin zuwa na gas a matsayin hanya mafi sauƙi ga ‘yan kasa.
Da yake jawabi a wurin taron, shugaban shirin, Barista Ismail Ahmed, ya bayyana cewa wannan yarjejeniya wani babban mataki ne na ganin an tabbatar da adalci da ɗorewa wajen sauya salon amfani da makamashi a ƙasar nan.
Ahmed ya fayyace cewa shirin ya ginu ne a kan abubuwa guda uku: Samuwa, Karɓuwa, da kuma Rahusa.
Ya bayyana cewa dole ne a samar da wuraren sauya injinan a ko’ina, a tabbatar wa jama’a cewa gas din ba shi da haɗari, sannan kuma a samar da hanyar biya cikin sauƙi.
“Ta hanyar wannan hadaka, talaka yanzu yana da damar samun bashin sauya injin motar sa ta hanyar bankunan da aka aminta da su, tare da tabbacin kuɗi daga gwamnati,” inji shi.
Ya ƙara da cewa wannan shiri ba wai kawai zai rage raɗaɗin tsadar sufuri ba ne, har ma zai samar da ayyukan yi ga ɗimbin matasa a ɓangaren ƙera injina, gyaran motoci, da kuma sarrafa sassan motocin a cikin gida.
A nasu ɓangaren, shugabannin hukumomin da suka ƙulla yarjejeniyar, ciki har da Uzoma Nwagba na CrediCorp, Ezekiel Oseni na NCGC, da Tobi Amira na Moniepoint, sun jaddada aniyar su ta bayar da duk wani tallafi da ake bukata domin tabbatar da cewa wannan shiri ya kai ga nasara, domin rage raɗaɗin kudin sufuri da kuma kare muhalli.
