Babbar Kotun Tarayya da ke Abuja a yau Alhamis ta ba Hukumar Yaƙi da Cin Hanci da Rashawa da Sauran Laifuffuka (ICPC) izinin shigar da da kuma nazarin na’urori masu aiki da wutar lantarki da aka ƙwato daga gidan tsohon gwamnan Jihar Kaduna, Nasir El-Rufa’i.
Mai Shari’a Joyce Abdulmalik ce ta bayar da wannan umurnin bayan lauyan ICPC, Osuobeni Akponimisingha, ya gabatar da buƙatar da roƙo a gaban kotun.
Yayin da yake gabatar da buƙatar, Akponimisingha ya roƙi kotu da ta ba hukumar izinin shigar da da kuma nazarin abubuwan da ke cikin na’urorin.
Ya ce hakan ne domin a duba su, a gudanar da binciken ƙwaƙwaf da kuma cire bayanai daga cikin su domin ci gaba da binciken da ake yi kan tsohon gwamnan.
Kamfanin Dillancin Labarai na Nijeriya (NAN) ya ruwaito cewa jami’an hukumar sun ƙwato kusan na’urori guda 14 yayin binciken da suka gudanar a gidan tsohon gwamnan da ke Abuja.
Daga cikin na’urorin akwai na’urar ajiyar bayanai ta Sony HD-EGS, na’urar ajiyar bayanai ta Transcend mai 1TB, na’urar ajiyar bayanai ta Toshiba, wayar Samsung, wayar Nokia N958GB, wayar Blackberry, da kuma wayar Google IDEOS.
Sauran sun haɗa da na’urar ajiyar bayanai ta Samsung – SPO802N, da ƙaramar komfutar tablet samfurin Remarkable, da Apple MacBook Pro baƙa, da rumbun ajiyar bayanai samfurin Seagate Freeagent Desk, da wayar ZTE, da rumbunan flash guda 10, da kuma katin memori samfurin Microcell.
An yi wa buƙatar rajista da lamba FHC/ABJ/CS/499/2026 tsakanin Tarayyar Nijeriya da Nasir Ahmad El-Rufai.
El-Rufai dai yana gaban wannan kotu ne a wata ƙara inda yake ƙalubalantar binciken da aka yi a gidan sa, tare da neman diyya har Naira biliyan 1.
A ƙarar da ya shigar domin kare haƙƙoƙin sa na asali, tsohon gwamnan ya sanya ICPC, da Babban Alƙalin Kotun Majistare ta FCT Abuja, da Sufeto Janar na ‘Yan Sanda (I-GP) da kuma Babban Lauyan Tarayya (AGF) a matsayin waɗanda yake ƙara na farko zuwa na huɗu.
A cikin takardar ƙarar da aka shigar mai lamba FHC/ABJ/CS/345/2026, wadda lauyan sa Oluwole Iyamu, SAN, ya shigar a ranar 20 ga Fabrairu, El-Rufa’i ya nemi kotu ta ba shi tanade-tanade guda bakwai.
Ya roƙi kotu da ta bayyana cewa kutsawa da binciken da aka yi a gidan sa da ke lamba 12, Titin Mambilla, Aso Drive, Abuja, a ranar 19 ga Fabrairu da misalin ƙarfe 2 na rana ta hannun ICPC da I-GP ya saɓa wa haƙƙoƙin sa na asali.
Ya ce hakan ya saɓa da mutuncin ɗan’adam, ‘yancin kai na mutum, adalci a shari’a, da kuma sirri, kamar yadda kundin tsarin mulkin Nijeriya ya tanada a sashe na 34, 35, 36 da 37.
Ya kuma roƙi kotun da ta bayyana cewa duk wata shaida da aka samu ta hanyar wannan sammacin bincike da yake ganin ba shi da inganci, ba za a iya amfani da ita ba a kowace shari’a da za a yi masa.
Saboda haka, El-Rufa’i ya nemi kotun da ta bayar da umurnin hana waɗanda yake ƙara da jami’an su amfani ko gabatar da duk wata shaida ko kayan da aka ƙwato daga gidan sa a yayin binciken a kowane irin bincike ko shari’a da ta shafe shi.
Ya kuma nemi kotu da ta umurci ICPC da Sufeto Janar na ‘Yan Sanda su maido masa da dukkan kayayyakin da aka ƙwato daga gidan sa, tare da cikakken jadawalin su.
Haka kuma ya nemi kotu da ta sa a biya shi Naira biliyan 1 a matsayin diyya ta gaba ɗaya, ta kafa misali, da kuma ta ƙarin hukunci, da sauran su.
Sai dai a cikin martanin rantsuwar da ta gabatar, ICPC ta ce ta samu wani ƙorafi ne kan El-Rufa’i, kuma bisa ga wannan ƙorafin ne ta fara bincike wanda har ya kai ga binciken da aka yi a gidan sa.
Hukumar ta ce jami’an ta sun yi aiki ne bisa ingantaccen sammacin bincike da aka bayar a ranar 18 ga Fabrairu, kuma aka aiwatar da shi a ranar 19 ga Fabrairu tsakanin ƙarfe 1:37 na rana zuwa 3:56 na rana a gidan da ke lamba 12 a Titin Mambilla, Asokoro, Abuja.
ICPC ta ce jami’an ta sun samu rakiyar jami’an Rundunar ‘Yan Sandan Nijeriya, kuma matar El-Rufa’i, Hadiza El-Rufa’i, da ɗan sa Mohammed El-Rufa’i duk sun shaida yadda aka gudanar da aikin.
Hukumar ta roƙi kotu da ta yi watsi da ƙarar, tare da gabatar da jerin kayayyakin da aka ce an ƙwato daga gidan.
‘Yan sanda ma a cikin nasu martanin, wanda Sufeto Ewa Anthony ya gabatar bisa rantsuwa, sun ce suna da iko a doka na gano laifuffuka, kama mutane, bincike da kuma gurfanar da masu laifi.
Sun ce binciken da aka yi a gidan El-Rufa’i an yi shi ne bisa sammacin bincike da wata kotu mai iko ta bayar.
Sun ƙaryata iƙirarin tsohon gwamnan cewa sammacin binciken ba shi da inganci, suna cewa umurnin kotu ne na gaske.
Sun ƙara da cewa jami’an da suka gudanar da aikin sun bi dukkan matakan doka da suka dace wajen aiwatar da sammacin binciken.
A cewar ‘yan sanda, mai ƙarar yana ƙoƙarin amfani da kotun ne domin kauce wa binciken tsaro da kuma yi masa shari’a.
Don haka suka roƙi kotu ta yi watsi da karar gaba ɗaya.
