Tsohon Shugaban jam’iyyar PDP na Ƙasa, Alhaji Bamanga Mohammed Tukur, ya rasu yana da shekaru 90.
Tukur ya rasu ne yau Asabar, 12 ga Satumba, 2026, a cewar wata sanarwa da iyalan sa suka fitar, wadda ɗan sa, Awwal D. Tukur, ya sanya wa hannu.
Iyalan sa sun bayyana tsohon shugaban na PDP a matsayin “uba kuma jagoran iyali abin ƙauna”, suna cewa ya sadaukar da rayuwar sa wajen yi wa iyalin sa, al’ummar sa, Jihar Adamawa da Nijeriya hidima.
“Cikin tsananin baƙin ciki da cikakkiyar miƙa wuya ga ikon Allah Maɗaukaki, iyali suna sanar da rasuwar uban mu kuma jagoran iyali abin ƙauna, Alhaji Bamanga Mohammed Tukur, wanda ya koma ga Mahaliccin sa a yau, 12 ga Satumba, 2026,” inji sanarwar.
Iyalin sun nuna godiyar su ga dukkan waɗanda suka yi musu addu’o’i, ta’aziyya da kuma goyon baya bayan rasuwar tasa.
Sun ce za a ba da sanarwar lokacin Sallar Jana’iza da sauran shirye-shiryen binne mamacin nan gaba.
“Mun roƙi Allah Maɗaukaki ya gafarta masa kurakuran sa, ya karɓi kyawawan ayyukan sa, ya kuma sanya shi cikin Aljannatul Firdausi,” inji iyalin.
An haifi Bamanga Tukur ne a ranar 15 ga Satumba, 1935, kuma da ya rayu, zai cika shekaru 91 bayan kwana uku kacal da rasuwar sa.
Ya taɓa zama Gwamnan tsohuwar Jihar Gongola, sannan ya riƙe muƙamin Ministan Masana’antu a lokacin mulkin soja na marigayi Janar Sani Abacha.
Tukur ya taɓa zama Babban Manajan Hukumar Tashoshin Jiragen Ruwa ta Nijeriya (NPA) kuma Babban Darakta, baya ga riƙe wasu muƙamai a harkokin kasuwanci da kuma fafutukar bunƙasa tattalin arzikin Afrika.
A watan Maris na 2012 ne aka zaɓe shi a matsayin Shugaban Jam’iyyar PDP na Ƙasa, a lokacin mulkin tsohon Shugaban Ƙasa Goodluck Jonathan.
Zaman sa a matsayin shugaban jam’iyyar ya zo ne a wani lokaci da PDP take fama da rikice-rikicen cikin gida, waɗanda daga bisani suka kai ga ɓullar ƙungiyar “New PDP” a shekarar 2013.
Tukur ya yi murabus daga shugabancin PDP a Janairu 2014, a daidai lokacin da rikicin cikin jam’iyyar ke ƙara tsananta.
Daga bisani, gwamnatin Jonathan ta naɗa shi Ambasada na Musamman (Ambassador-at-Large).
