Shugaba Bola Ahmed Tinubu ya miƙa saƙon ta’aziyyar sa bisa rasuwar tsohon gwamnan tsohuwar Jihar Gongola, fitaccen ɗan kasuwa kuma dattijon ƙasa, Alhaji Bamanga Muhammad Tukur, wanda ya rasu yana da shekaru 91.
Shugaba Tinubu ya bayyana marigayin, wanda shi ne Tafidan Adamawa, a matsayin babban jigo da ya taka muhimmiyar rawa a harkokin mulki, siyasa, masana’antu da kasuwanci.
Alhaji Bamanga ya taɓa zama babban manajan Hukumar Kula da Tashoshin Jiragen Ruwa ta Nijeriya (NPA) daga 1975 zuwa 1982, kafin daga bisani ya zama gwamnan Jihar Gongola a cikin 1983.
Marigayin ya kuma riƙe muƙamin Ministan Masana’antu a gwamnatin Janar Sani Abacha daga 1993 zuwa 1995, sannan ya jagoranci wasu manyan kamfanoni a ɓangaren masana’antu, noma, sufuri da kasuwanci.
A fagen siyasa, ya zama Shugaban jam’iyyar PDP na Ƙasa daga watan Maris 2012 zuwa Janairu 2014, yayin da a matakin Afrika ya taka rawa wajen bunƙasa kasuwanci da haɗin gwiwar tattalin arzikin nahiyar.
Shugaba Ƙasa ya bayyana Alhaji Bamanga a matsayin mutum mai hangen nesa, karamci da kishin ƙasa, yana mai cewa Nijeriya za ta yi kewar shawarwarin sa da jagorancin sa na uba.
Ya miƙa ta’aziyya ga iyalan marigayin, Masarautar Fombina ta Adamawa, gwamnati da al’ummar Jihar Adamawa da ‘yan kasuwa da ‘yan siyasa baki ɗaya, tare da roƙon Allah ya gafarta masa kurakuran sa, ya ba shi Aljannar Firdausi, ya kuma ba iyalan sa haƙurin jure wannan rashi.
