A ƙoƙarin sa na kare darajar tsarin harkokin kuɗi a Nijeriya, Babban Bankin Nijeriya (CBN) ya ƙara ƙarfafa sa-ido wajen kula da harkokin kuɗi, domin daƙile duk wasu hanyoyi da kafofin da masu ɗaukar nauyin ta’addanci ke bi.
CBN ya jaddada cewa ya mayar da wannan batu a matsayin ɗaya daga cikin manyan abubuwan da yake bai wa fifiko a halin yanzu, domin hana miyagun mutane amfani da tsarin kuɗin ƙasar nan wajen aikata ayyukan da ba su dace ba.
CBN ya bayyana haka ne a cikin wata sanarwa mai ɗauke da sa hannun Daraktar Riƙo a Sashen Hulɗa da Jama’a da Hulɗa da Masu Zuba Jari, Hajiya Hakama Sidi-Ali, wadda aka raba wa manema labarai a ranar Talata.
A ƙarƙashin wannan sabon matakin ƙara tsaurara sa-ido, CBN ya ce zai mayar da hankali sosai musamman kan yadda cibiyoyin kuɗi ke tafiyar da haɗarin da ke tattare da samar da kuɗaɗen tallafa wa ta’addanci, sa-ido kan hada-hadar kuɗi, aiwatar da takamaiman takunkuman hadahadar kuɗi, da kuma bayar da rahoton duk wata mu’amala mai cike da shakku da ake dangantawa da tallafa wa ta’addanci.
Bankin ya ce zai ci gaba da amfani da tsarin sa-ido bisa la’akari da girman haɗari, ciki har da bincike kai tsaye a cibiyoyin kuɗi da kuma sa-ido daga nesa, domin ƙarfafa matakan yaƙi da masu halatta kuɗaɗen haram (AML), yaƙi da masu samar da kuɗaɗen ta’addanci (CFT), da kuma hana hadahadar samar da kuɗaɗen yaɗuwar makamai masu haɗari (CPF) a faɗin ɓangaren harkokin kuɗi.
A cewar CBN, za a aiwatar da waɗannan matakai ne bisa ga dokoki da ƙa’idojin da ake da su a halin yanzu.
Babban bankin ya kuma bayyana cewa matakin yana tallafa wa haɗin gwiwar Nijeriya a gida da kuma ƙasashen duniya wajen yaƙi da samar da kuɗaɗen ta’addanci, hana samar da kuɗaɗen yaɗuwar makamai masu haɗari, da kuma faɗaɗa ƙoƙarin ƙarfafa mutuncin tsarin kuɗi da kare tsarin kuɗin ƙasar nan.
CBN ya ƙara da cewa, “za a ci gaba da gudanar da ƙarin sa-ido da tuntuɓa idan buƙatar hakan ta taso.”
Sanarwar ta ƙara da cewa wannan mataki yana nuna ci gaba da jajircewar CBN wajen kare tsarin kuɗi na Nijeriya daga ayyukan da ba bisa ƙa’ida ba, tare da bayar da gagarumar gudunmawa a fannin ƙoƙarin ƙarfafa mutunci da amincin tsarin kuɗi, a matakin cikin gida da kuma na ƙasa da ƙasa.
