Hukumar Kula da Shige da Fice ta Nijeriya (NIS), wato Magireshin, ta kama wasu mutane biyu a Jihar Adamawa da ake zargi da kasancewa membobin wata ƙungiyar masu garkuwa da mutane, tare da ƙwato kuɗin fansa har Naira miliyan 34 a wani samame da ta gudanar a jihar.
Waɗanda ake zargin su ne Alhaji Jaye, mai shekara 55, da Buba Bello, mai shekara 34. An kama su ne a ranar 6 ga Satumba, 2026, bayan jami’an hukumar sun gudanar da wani samame.
A yayin fara yi musu tambayoyi, waɗanda ake tsare da su sun shaida wa jami’an shige da fice cewa kuɗin Naira miliyan 34 ɗin an tanade su ne domin biyan kuɗin fansa don a saki ɗan’uwan Buba Bello.
Kwanturola-Janar na Hukumar Kula da Shige da Fice ta Nijeriya ya bayar da umurnin miƙa waɗanda ake zargin da kuɗin da aka ƙwato ga Rundunar ’Yan Sandan Jihar Adamawa domin su ci gaba da gudanar da bincike da ɗaukar matakan da suka dace.
A wani samamen na daban, jami’an hukumar sun kuma tare wasu baƙin haure 17 da suka shiga Nijeriya ba bisa ƙa’ida ba a Rumde Baru, cikin Ƙaramar Hukumar Yola ta Kudu, bayan samun sahihan bayanan sirri.
An gano baƙin hauren ne a wani gida mai ɗakuna uku mallakar wani mutum. Binciken farko da aka gudanar ya nuna cewa 13 daga cikin su ’yan ƙasar Kamaru ne, waɗanda suka ƙunshi maza takwas da mata biyar, yayin da sauran huɗu ’yan ƙasar Chadi ne, dukkan su maza.
Rundunar hukumar ta Adamawa ta ce za ta ci gaba da ƙarfafa tsarin kula da ƙaura, tsaron iyakokin ƙasa da kuma kare yankin ƙasa, tare da kira ga jami’an ta da su kasance cikin shiri da taka-tsantsan tare da bayar da bayanan sirri cikin lokaci kan sababbin barazanar tsaro da ke kunno kai.
👉 Ku biyo New Citizen Hausa domin samun ƙarin labarai.
