Tattalin arzikin Nijeriya ya ci gaba da nuna alamun bunƙasa a zangon na biyu na shekarar 2026, inda aka samu ƙaruwar kashi 4.43 cikin 100 na Babban Haɗaɗɗen Kuɗin Shiga Ƙasa (GDP), a cewar Ma’aikatar Kuɗi ta Tarayya.
Wannan adadi ya zarce kashi 4.23 cikin 100 da aka samu a makamancin lokacin shekarar 2025, haka kuma ya haura kashi 3.89 cikin 100 da aka samu a zangon farko na shekarar 2026.
Ma’aikatar Kuɗin Tarayya ta bayyana cewa wannan ci gaba ya ɗaga matsakaicin bunƙasar tattalin arzikin ƙasar a farkon rabin shekarar 2026 zuwa kashi 4.16 cikin 100, idan aka kwatanta da kashi 3.68 cikin 100 da aka samu a makamancin lokacin shekarar 2025.
Ta kuma ce bunƙasar tattalin arzikin ta fara yaɗuwa zuwa sassa daban-daban na ƙasar, inda sassa 27 na tattalin arzikin suka samu bunƙasar da ta haura kashi uku cikin 100 a zangon na biyu na shekarar 2026, idan aka kwatanta da sassa 23 da suka samu irin wannan bunƙasar a shekarar da ta gabata.
A ɓangaren samar da kayayyaki, masana’antu sun samu bunƙasar kashi 3.24 cikin 100, daga kashi 1.60 cikin 100 da aka samu a makamancin lokacin shekarar 2025.
Haka kuma, ɓangaren noma ya bunƙasa da kashi 4.39 cikin 100, idan aka kwatanta da kashi 2.82 cikin 100 da aka samu a shekarar da ta gabata.
A gefe guda kuma, ɓangaren ayyuka, wanda shi ne mafi girman ɓangaren tattalin arzikin Nijeriya, ya samu bunƙasar kashi 4.60 cikin 100, daga kashi 3.94 cikin 100 da aka samu a makamancin lokacin shekarar 2025.
Ma’aikatar ta kuma bayyana cewa ƙarin darajar da naira ta samu, tare da daidaituwar kasuwar canjin kuɗaɗen waje, sun taimaka wajen ƙara darajar tattalin arzikin Nijeriya idan aka auna shi da dalar Amurka.
A cewar ma’aikatar, naira ta samu ƙarin daraja da sama da kashi 12 cikin 100 tsakanin farkon rabin shekarar 2025 da makamancin lokacin shekarar 2026. Wannan ya taimaka wajen ƙara darajar tattalin arzikin ƙasar da kusan kashi 17 cikin 100 idan aka auna shi da dalar Amurka.
Ma’aikatar Kuɗin Tarayya ta ce waɗannan alkaluma na nuna cewa Najeriya na kan turbar cimma burin Gwamnatin Tarayya na mayar da tattalin arzikin ƙasar zuwa dala tiriliyan ɗaya nan da shekarar 2030.
Ta ƙara da cewa Asusun Ba da Lamuni na Duniya (IMF) ya sanya Nijeriya cikin ƙasashe 10 da ake sa ran za su fi bayar da gagarumar gudunmawa wajen bunƙasar tattalin arzikin duniya a shekarar 2026.
Sai dai gwamnati ta jaddada muhimmancin ci gaba da aiwatar da sauye-sauyen tattalin arziki domin tabbatar da cewa bunƙasar da ake samu ta kasance mai ɗorewa, tare da sauƙaƙa rayuwar talakawa da sauran ‘yan ƙasar.
