Gwamnatin Tarayya ta sake jaddada ƙudirin ta na kawo ƙarshen rashin tsaro a faɗin ƙasar nan, ta hanyar ƙara mayar da hankali kan gudanar da ayyukan tsaro cikin gaggawa, tsara dabarun tsaro na dogon lokaci da kuma ƙarfafa haɗin gwiwa da gwamnatocin jihohi.
Ƙaramin Ministan Tsaro, Dakta Bello Muhammad Matawalle, ya bayyana hakan yayin wata ziyarar ta’aziyya da tantance halin da ake ciki da ya kai Jihar Kano a ranar Litinin, bayan harin da ‘yan bindiga suka kai ƙauyen Chiroma da ke Ƙaramar Hukumar Garun Malam a ranar 29 ga Agusta, 2026.
Matawalle, wanda ya ziyarci Fadar Gwamnatin Jihar Kano, ya ce gwamnatin Shugaba Bola Ahmed Tinubu ta himmatu wajen kawo ƙarshen rashin tsaro da tabbatar da zaman lafiya mai ɗorewa a faɗin Nijeriya.
Ya ce Gwamnatin Tarayya na ƙaddamar da sabbin dabaru domin tunkarar ƙalubalen tsaro, ciki har da shirin samar da Tsarin Tsaro da Kare Ƙasa na tsawon shekaru biyar.
“Shugaban Ƙasa ya kafa wani kwamiti domin tsara Tsarin Tsaro da Kare Ƙasa na shekaru biyar. Wannan zai jagoranci tsarin mu na dogon lokaci wajen tunkarar barazanar tsaro a faɗin ƙasar,” inji ministan.
Matawalle ya bayyana cewa bayan harin, Kwamandan Birged ta 3 da ke Kano, Birgediya Janar Jimoh, ya jagoranci wani samame na haɗin gwiwa domin ceto waɗanda aka yi garkuwa da su, tare da jami’an Rundunar Haɗin Gwiwa ta JTF daga sansanonin Hawan-Kwano da Kwanar Dangora.
Ya ce aikin ya yi nasarar ceto waɗanda aka yi garkuwa da su a yankunan gadar ‘Yankifi da Marabar Kwari da ke Ƙaramar Hukumar Garun Malam.
Ministan ya yaba wa dakarun saboda jajircewar su da kuma gaggawar da suka yi wajen mayar da martani, yana mai tabbatar da cewa Gwamnatin Tarayya za ta ci gaba da ƙarfafa ƙarfin aiki na Rundunar Sojin Nijeriya da sauran hukumomin tsaro.
“Za mu ci gaba da yin duk mai yiwuwa domin tallafa wa hukumomin tsaron mu don tabbatar da cewa ƙasar mu tana cikin aminci. Ina tabbatar muku cewa nan ba da jimawa ba rashin tsaro zai zama tarihi, kuma dukkan mu za mu rayu cikin zaman lafiya da wadata,” inji shi.
Matawalle ya jaddada cewa samun nasara mai ɗorewa a yaƙi da rashin tsaro na buƙatar haɗin gwiwar kowane mataki na gwamnati da al’umma baki ɗaya.
“Yaƙi da wannan matsalar rashin tsaro na buƙatar haɗin gwiwar ƙananan hukumomi da gwamnatocin jihohi da kuma Gwamnatin Tarayya. Haka kuma muna buƙatar samun sahihan bayanai cikin lokaci daga jama’a zuwa hukumomin tsaro,” inji shi.
Ya kuma tabbatar wa gwamnatin Jihar Kano cewa Gwamnatin Tarayya za ta ƙara mata tallafi, ciki har da tura ƙarin motocin yaƙi, makamai da sauran kayan aiki domin ƙarfafa ayyukan tsaro a jihar.
Tun da farko, Matawalle ya gudanar da wani taron tsaro a ƙulle tare da kwamandojin Birged ta 3 da sauran rundunonin tsaro da ke Kano, inda ya umurce su da su ci gaba da ƙarfafa ayyukan da ake gudanarwa tare da ƙara ƙaimi wajen kare al’ummomi.
Ministan ya sake nanata ƙudirin Gwamnatin Tarayya na samar da dukkan kayan aiki da tallafin da ake buƙata domin kare rayuka da dukiyoyin jama’a da kuma tabbatar da cikakken ikon Nijeriya kan yankunan ta.
A nasa jawabin, Gwamnan Jihar Kano, Abba Kabir Yusuf, ya gode wa ministan bisa ziyarar da ya kai jihar, tare da tabbatar da cewa gwamnatin jihar za ta ci gaba da haɗin gwiwa da Gwamnatin Tarayya wajen yaƙi da rashin tsaro.
“Muna da cikakken yaƙini da jagorancin ku. A matakin jiha, za mu ci gaba da yin duk abin da ya kamata domin tabbatar da tsaro da zaman lafiya a Kano,” in ji gwamnan.
“Mun ji ƙudirin Shugaban Ƙasa na tabbatar da tsaro a Nijeriya, kuma za mu tabbatar da cewa wannan annobar rashin tsaro ba ta ci gaba da zama a yankin mu.”
