Babban Bankin Nijeriya (CBN) ya bayyana cewa a cikin watan Juli na 2026, Nijeriya ta samu kuɗaɗen da ’yan ƙasar mazauna ƙasashen waje suka turo cikin ƙasa waɗanda adadin su ya kai dala miliyan 947.
CBN ya ce an turo jimillar adadin waɗannan kuɗi ne ta hannun kamfanonin aika kuɗi na ƙasa da ƙasa (IMTOs) a watan Yuli 2026.
Wannan shi ne mafi yawan kuɗaɗen da aka taɓa samu a cikin wata guda ta hanyoyin da aka amince da su, kuma hakan ya ƙara kusantar da Babban Bankin Nijeriya (CBN) a ƙoƙarin bankin na ganin ya cimma burin sa na samun dala biliyan ɗaya a duk wata.
Gwamnan CBN, Olayemi Cardoso, ya bayyana cewa kuɗaɗen da aka shigo da su ta hannun IMTOs sun kai dala biliyan 3.8 a cikin watanni bakwai na farkon shekarar 2026, wanda ke nuna ƙarin kashi 50.2 cikin 100 idan aka kwatanta da adadin da aka samu a makamancin wannan lokaci na shekarar 2025.
Haka kuma sabbin alƙaluman sun nuna gagarumin ƙaruwa a yawan kuɗaɗen da ’yan Nijeriya mazauna ƙasashen waje ke turawa cikin ƙasar ta hanyoyin kuɗi na hukuma, yayin da CBN ke ci gaba da aiwatar da sauye-sauyen da suka shafi inganta gaskiya, sauƙaƙa hanyoyin aika kuɗi da kuma ƙara gasa a kasuwar aiko kuɗaɗen ƙasashen waje zuwa Nijeriya.
Waɗannan sauye-sauyen sun haɗa da matsawa zuwa tsarin canjin kuɗin waje da kasuwa ke ƙayyadewa, sauya dokokin da ke kula da ayyukan kamfanonin IMTOs, da kuma ƙaddamar da Lambar Tabbatar da Bankin ’Yan Nijeriya da ke zaune a ƙasashen waje (NRBVN).
CBN ya kuma ƙara ƙarfafa hulɗa da kamfanonin IMTOs, bankuna da ’yan Nijeriya mazauna ƙasashen waje, tare da ƙarfafa buƙatar tabbatar da cewa duk wasu hadahadar aika kuɗaɗen ƙasashen waje su ratsa ta asusun ajiyar kuɗaɗen da aka ware na musamman a bankunan dillalan kuɗin waje da aka bai wa izini.
A cewar CBN, ƙarin kuɗaɗen da ake samu ta hanyoyin hukuma na da muhimmiyar fa’ida fiye da samun wani babban adadi a cikin wata guda kawai. Ƙarin kuɗaɗen da ’yan Nijeriya mazauna ƙasashen waje ke turawa na iya taimakawa wajen ƙara yawan kuɗaɗen waje da ke samuwa a kasuwa, inganta gaskiya a harkar musayar kuɗi, tare da tallafa wa amfani da kuɗi a gidaje, saka hannun jari da kuma ganin Nijeriya na samun kuɗaɗen waje daga ƙetare.
“Lokacin da muka tsara cimma wani buri bayyananne na kai yawan kuɗaɗen da ake turo wa Nijeriya ta hanyoyin hukuma zuwa dala biliyan ɗaya a kowane wata, kusan shekaru biyu da suka wuce, wasu mutane sun yi tunanin cewa mafarki muke yi. Yanzu da muka samu dala miliyan 947 a watan Yuli, mun kusa cimma wannan buri,” inji Cardoso.
Gwamnan ya ce manufar CBN ba ta tsaya kawai wajen samun wani babban adadi a cikin wata guda ba, sai dai tabbatar da cewa ana ci gaba da samun ƙaruwa mai ɗorewa a yawan kuɗaɗen da ake turowa cikin Nijeriya ta hanyoyin hukuma.
CBN ya ce ƙarin da aka samu cikin watanni bakwai na farko na shekarar 2026 ya samo asali ne daga tasirin matakan da aka ɗauka domin sanya hanyoyin aiko kuɗaɗen ƙasashen waje na hukuma su kasance masu sauƙin amfani, gasa da kuma gaskiya.
CBN ya ce zai ci gaba da tabbatar da ɗorewar wannan nasara ta hanyar ƙara hulɗa da al’ummomin ’yan Nijeriya mazauna ƙasashen waje da masu ruwa da tsaki a harkar kuɗi a manyan hanyoyin da ake tura kuɗaɗe zuwa Nijeriya.
A wani ɓangare na hulɗar da yake yi a ƙasashen waje, CBN ya ce zai ci gaba da amfani da damar da yake samu a manyan cibiyoyin hadahadar kuɗi na duniya domin tattaunawa da ’yan Nijeriya mazauna ƙasashen waje, kamfanonin IMTOs, bankuna da sauran masu ruwa da tsaki, da nufin rage matsalolin da ke kawo cikas ga aika kuɗaɗe da kuma ƙarfafa mutane su riƙa amfani da hanyoyin hukuma wajen tura kuɗi.
“Adadin miliyoyin dalolin da mazauna ƙasashen waje suka aiko Nijeriya a cikin watan Yuli wata muhimmiyar alama ce, amma abin da muka fi mayar da hankali a kai ba nasarar wata guda ɗaya ba ce. Abin da muke so shi ne samar da yanayin da zai bada damar ci gaba da samun ƙaruwa mai ɗorewa a kuɗaɗen da ake turo wa Nijeriya ta hanyoyin hukuma. Muna sa ran ci gaba da ganin kyautatuwa, kuma mun yi imanin cewa Nijeriya za ta iya cimma, sannan ta ci gaba da samun, sama da dala biliyan ɗaya a duk wata,” cewar Cardoso.
