Rundunar ‘Yan Sandan Jihar Neja ta tabbatar da sace wasu masu ibada a wani masallaci da ke gundumar Dekara, a Ƙaramar Hukumar Borgu ta jihar.
Mai magana da yawun rundunar, SP Wasiu Abiodun, ya shaida wa Kamfanin Dillancin Labaran Nijeriya (NAN) a yau Asabar cewa lamarin ya faru ne da misalin ƙarfe 2 na jiya Juma’a, 21 ga Agusta, yayin da waɗanda lamarin ya shafa suke gudanar da sallar Juma’a.
Ya ce har yanzu ba a tabbatar da ainihin adadin mutanen da aka sace ba.
A cewar sa, ‘yan ta’addan sun fara kai hari ne a ƙauyukan Gidan-Zana da Kpenya kafin daga bisani su wuce zuwa masallacin, inda suka sace adadin masu ibadar da ba a tantance ba.
Ya ce babu wanda ya rasa ran sa a harin, inda ya ƙara da cewa an tura jami’an tsaro na haɗin gwiwa zuwa yankin domin tantance halin da ake ciki da kuma gudanar da aikin ceto.
Abiodun ya bayyana cewa, “A ranar 21/8/2026 da misalin ƙarfe 4 na yamma, an samu rahoton cewa a wannan rana da misalin ƙarfe 2 na rana, wasu da ake zargin ‘yan ta’adda ne sun mamaye ƙauyukan Gidan-Zana da Kpenya ta Dekara, cikin Ƙaramar Hukumar Borgu, tare da kai hari a Masallacin Kpenya, inda suka sace adadin mutane da ba a tantance ba yayin da suke sallah. Wasu kuma sun tsere zuwa dajin da ke kusa.
“Rahoton da ake samu ya zuwa yanzu ya nuna cewa babu wanda ya rasa ran sa, yayin da aka tura jami’an tsaro na haɗin gwiwa zuwa yankin domin tantance halin da ake ciki da kuma gudanar da aikin ceto.
“Za a sanar da jama’a duk wani sabon bayani,” inji shi.
