Shugaban Ƙasa Bola Ahmed Tinubu ya ce kiran da wasu ‘yan siyasa ke yi na a dawo da tallafin man fetur ya samo asali ne daga “jahilci mai tsanani kan shugabanci da tattalin arziki.”
Tinubu ya bayyana hakan ne a ranar Alhamis lokacin da Gwamnan Jihar Osun, Ademola Adeleke, ya kai masa ziyara a Fadar Shugaban Ƙasa da ke Abuja.
Shugaban ya ce kafin zuwan sa kan mulki, jihohi 27 ba sa iya biyan albashin ma’aikatansu, balle kuma biyan kuɗaɗen fansho.
Ya bayyana albashin ma’aikata a matsayin muhimmin ginshiƙi wajen tafiyar da tattalin arzikin jihohi, saboda albashin na taimaka wa iyalai da kuma ƙara yawan kuɗin da ake kashewa a cikin tattalin arzikin ƙasa.
A cewar sa, cire tallafin man fetur ya bai wa gwamnati damar ƙara yawan kuɗaɗen da take rabawa da amfani da su wajen gudanar da ayyukan raya ƙasa, ciki har da gina hanyoyi, gidaje, makarantu da asibitoci.
Tinubu ya ƙara da cewa matakin ya kuma taimaka wajen farfaɗo da harkokin kiwon lafiya da kuma horar da malamai da ma’aikatan lafiya.
Shugaban ya kuma taya Adeleke murnar nasarar da ya samu a zaɓen gwamnan Jihar Osun, yana mai cewa al’ummar jihar sun sake zaɓar sa ne domin ya ci gaba da jagorantar su.
Ya buƙaci ‘yan siyasa su mutunta sakamakon zaɓe tare da mayar da hankali wajen gina haɗin kai da ci gaban al’umma.
“Ba galaba ka yi a kan kowa ba, ka ci zaɓe ne. Wannan shi ne ainihin dimokiraɗiyya,” inji shi.
