Dakarun Rundunar Sojin Nijeriya ta 8 sun samu gagarumar nasara a yaƙi da ’yan bindiga bayan sun kuɓutar da mutum 14 da aka yi garkuwa da su tare da ƙwato dabbobi 281 da aka sace a wani hari da aka kai ƙauyen Horo Birni da ke Ƙaramar Hukumar Shagari a Jihar Sakkwato.
Majiyar soji ta bayyana wa Kamfanin Dillancin Labarai na Nijeriya (NAN) cewa lamarin ya faru ne da safiyar ranar jiya Talata, inda mazauna ƙauyen suka aika da kiran gaggawa bayan ’yan bindiga sun afka masu, suka yi awon gaba da mutane da kuma dabbobi.
Bayan samun rahoton, dakarun sojin suka nufi yankin ba tare da ɓata lokaci ba. Da suka cim ma maharan, sai aka gwabza musayar wuta mai zafi, lamarin da ya sanya ’yan bindigar suka watse domin tsira da rayukan su.
Majiyar ta ce sakamakon matsin lambar da sojojin suka yi musu, maharan sun gudu cikin daji dauke da raunukan harbin bindiga, inda suka bar duk mutanen da suka yi garkuwa da su da kuma yawancin dabbobin da suka sace.
Wani dattijo tare da sojoji bayan an kuɓutar da shi daga hannun ‘yan bindiga a Jihar Sakkwato
A cewar majiyar, dakarun sun yi nasarar ceto mutum 14 tare da ƙwato shanu 195, tumaki 84, raƙuma biyu da babura biyu, waɗanda ake kyautata zaton mallakin mazauna ƙauyen ne.
Ta ce gaggawar da jami’an sojin suka yi wajen amsa kiran neman agaji ce ta hana maharan cimma manufar su, tare da ba da damar ceto rayuka da kuma dawo da dukiyoyin al’umma.
Majiyar ta kuma tabbatar da cewa Rundunar Sojin Nijeriya za ta ci gaba da gudanar da samame da sintiri a sassan da ke fama da matsalar tsaro domin hana ayyukan ’yan bindiga da sauran masu aikata laifuffuka.
Ta yi kira ga jama’a da su ci gaba da bai wa jami’an tsaro sahihan bayanan sirri da kuma kai rahoton duk wani abin da ke haifar da zargi, domin ƙarfafa yaƙi da rashin tsaro.
