Gwamnan Jihar Neja, Alhaji Mohammed Umaru Bago, ya sake jaddada ƙudirin gwamnatin sa na ci gaba da bai wa mata damar shiga harkokin mulki tare da kasancewa cikin masu yanke muhimman shawarwari a jihar.
Gwamnan ya bayyana hakan ne lokacin da ya karɓi baƙuncin Ƙungiyar Mata Masu Ruwa da Tsaki ta Shiyyar C (Zone C) a ziyarar girmamawa da suka kai masa a Fadar Gwamnati da ke Minna.
A cikin wata sanarwa da Babban Sakataren Yaɗa Labaran sa, Ibrahim Bologi, ya fitar ranar Juma’a, gwamnan ya yaba wa mata kan irin muhimmiyar gudunmawar da suke bayarwa wajen cigaban siyasa, yana mai cewa su ne ginshiƙin nasarar sa a fagen siyasa.
Ya ce sama da mata miliyan ɗaya da suka yi rajista a jam’iyyar APC daga Shiyyar C babban ƙarfi ne da ba za a yi wasa da shi ba.
Gwamnan ya kuma yaba wa matan yankin bisa yadda suka ci gaba da nuna jajircewa da biyayya ga APC duk da ƙalubalen tsaro da yankin arewacin jihar yake fuskanta, yana mai cewa hakan abin yabawa ne kuma ya cancanci girmamawa.
Ya buƙace su da su ci gaba da fitowa da yawa wajen mara wa manufofin Ajandar Sabuwar Fata (Renewed Hope Agenda) ta Shugaba Bola Ahmed Tinubu da kuma Ajandar Sabuwar Neja (New Niger Agenda) baya.
Bago ya bayyana ƙungiyar a matsayin abin koyi, yana mai cewa ta kafa tarihi tare da zaburar da sauran shiyyoyin jihar da su haɗa kan mata domin ƙarfafa jam’iyyar APC da kuma tallafa wa shirye-shiryen gwamnatin jihar.
Ya ce ya gamsu da yadda ƙungiyar ta tsara kan ta cikin tsari mai kyau, tare da tabbatar da cewa gwamnatin jihar za ta yi la’akari da wasu daga cikin membobin ta wajen cike guraben muƙaman gwamnati idan lokaci ya yi.
Haka kuma, gwamnan ya tabbatar da cewa gwamnatin sa tana ci gaba da ɗaukar matakai masu ƙarfi domin magance matsalolin tsaro a Ƙaramar Hukumar Borgu da sauran sassan jihar, domin tabbatar da zaman lafiya da kare rayuka da dukiyoyin al’ummar Neja.
A nata jawabin, jagorar tawagar ƙungiyar, Hajiya Hauwa Baƙo Kontagora, ta yaba wa Bago kan irin goyon bayan da yake bai wa mata a faɗin jihar.
Ta bayyana cewa ƙungiyar ta haɗa tsofaffin masu riƙe da muƙaman gwamnati da masu ci a yanzu, ciki har da kwamishinoni, masu ba da shawara na musamman, darakta-janar-janar, daraktocin zartarwa, mataimakan shugabannin ƙananan hukumomi, shugabannin mata na ƙananan hukumomi, da sauran masu ruwa da tsaki.
A cewar ta, an kafa ƙungiyar ne domin haɗa kan mata, ƙarfafa muryar su ta hanyar faɗaɗa shigar su cikin harkokin mulki, tare da ci gaba da aiki kafaɗa da kafaɗa da gwamnatin jihar wajen bunƙasa shirye-shiryen ƙarfafa mata, inganta tattalin arzikin su da sauran ayyukan cigaba.
Hajiya Hauwa ta ce ƙungiyar tana neman a ƙara bai wa mata damar riƙe muƙaman jagoranci, shiga yanke muhimman shawarwari da kuma taka rawa wajen aiwatar da shirye-shiryen cigaban jihar.
Ta tabbatar wa da gwamnan cewa membobin ƙungiyar za su ci gaba da haɗa kai da gwamnatin sa domin tabbatar da cigaba, zaman lafiya da gina Jihar Neja mai ƙarfi da wadata.
