Ƙungiyar ta’addanci ta Boko Haram ta fitar da wani bidiyon ta’aziyya ga ɗaya daga cikin masu ɗaukar bidiyo da hotunan ta, mai suna Abu Salim al-Barnawi, wanda dakarun sojin Nijeriya suka kashe yayin wani hari da ya ci tura kan wani sansanin soji.
Bidiyon, mai tsawon mintuna uku da daƙiƙa uku, wanda wakilin mu ya samu a ranar Laraba, an yi shi ne da harshen Larabci, kuma ya nuna Abu Salim al-Barnawi yana ɗaukar bidiyon hare-haren Boko Haram tare da shiga ayyukan ƙungiyar.
Muƙaddashin Jami’in Yaɗa Labarai na Rundunar Haɗin Gwiwa ta Arewa-maso+Gabas, Operation Haɗin Kai, Kyaftin Muhammed Goni, wanda ya wallafa bidiyon, ya ce mamacin ya taba jagorantar hare-hare a ƙasar Kamaru kafin daga bisani ya koma sashen yaɗa labarai na ƙungiyar.
Rubutun da aka haɗa da bidiyon ya ce: “‘Yan ta’addan Boko Haram sun fitar da ta’aziyya kan jagoran kai hari kuma mai ɗaukar hoton bidiyo, Abu Salim al-Barnawi.”
An kuma ƙara da cewa:“An kashe shi a makon da ya gabata a hannun sojojin Nijeriya lokacin da ƙungiyar ta’addanci ta kai hari kan sansanin sojojin Nijeriya. Shi ne mai ɗaukar hoto da bidiyo na ƙungiyar. A baya ya jagoranci hare-hare zuwa ƙasar Kamaru kafin daga bisani ya shiga sashen yaɗa labarai na ƙungiyar ta’addancin..”
Wannan na zuwa ne kwanaki kaɗan bayan da dakarun Operation Haɗin Kai suka bayyana kashe wani da ake zargin mai ɗaukar bidiyo ne na Islamic State West Africa Province (ISWAP) a lokacin da ‘yan ta’addan suka yi yunƙurin kutsawa yankin Cross Kauwa da ke Ƙaramar Hukumar Kukawa ta Jihar Borno, amma harin ya ci tura.
A cewar Kyaftin Goni, ‘yan ta’addan sun yi ƙoƙarin amfani da duhun dare domin mamaye sansanin sojoji tare da kwashe kayayyakin maganin cutar kwalara, amma dakarun sojin suka fatattake su.
Ya ce a yayin aikin an ƙwato kyamarar bidiyo ta Sony, harsasai masu yawa na PKT da 7.62mm Special, kayan sanye na ‘yan ta’adda da sauran kayayyakin yaƙi.
Goni ya kuma bayyana cewa bidiyoyin da aka ƙwato a yayin aikin sun nuna akwai wasu baƙi uku da ke taimaka wa ƙungiyar ta’addancin, ciki har da wani Bafalasɗine da ake bayyana a matsayin mai horaswa, da kuma wani ɗan ƙasar Morokko da ke aiki a matsayin likitan ƙungiyar a Jihar Borno.
