Gwamnan Babban Bankin Nijeriya (CBN), Mista Olayemi Cardoso, ya sake jaddada ƙudirin bankin na tabbatar da daidaiton tattalin arziki ta hanyar aiwatar da manufofin kuɗi masu haɗin kai da suka dogara da bayanai, yana mai cewa tattalin arzikin Nijeriya yana ci gaba da kasancewa mai ɗorewa duk da rashin tabbas da ake fuskanta a tattalin arzikin duniya.
Cardoso ya bayyana hakan a ranar Talata yayin kammala taron Kwamitin Manufofin Kuɗi (MPC) karo na 306, inda kwamitin ya yi nazari kan halin tattalin arzikin cikin gida da na duniya tare da sake jaddada aniyar sa ta tabbatar da daidaiton farashi da kuma kare tsarin kuɗi na ƙasar nan.
A cewar sa, ana hasashen tattalin arzikin Nijeriya zai ci gaba da samun ƙwarin bunƙasa a shekarar 2026, sakamakon ƙaruwa a yawan hako ɗanyen mai, ingantattun alƙaluman Purchasing Managers’ Index (PMI) da kuma tasirin sauye-sauyen tattalin arziki da gwamnatin Tinubu take aiwatarwa.
Ya ce Kwamitin Manufofin Kuɗi yana ci gaba da kasancewa a shirye domin ɗaukar matakan manufofin kuɗi da suka dace don rage hauhawar farashin kayayyaki tare da mayar da shi zuwa kaso guda ɗaya cikin matsakaicin lokaci.
Game da harkar bankuna, Cardoso ya yaba da nasarar da aka samu wajen kammala shirin ƙara jarin bankuna, yana mai cewa hakan babban mataki ne na ƙarfafa tsarin kuɗi na Nijeriya.
Ya kuma tabbatar da cewa tsarin bankunan ƙasar nan yana ci gaba da kasancewa lafiya, mai ƙarfi kuma abin dogaro.
Ya bayyana cewa matakin da CBN ya ɗauka kwanan nan kan bankunan ƙananan kuɗi (Microfinance Banks) guda 46 ya zama dole ne domin magance take dokoki da rashin bin ƙa’idojin da suka daɗe suna faruwa.
Ya ce, “Kare kuɗaɗen masu ajiya shi ne babban abin da CBN ya fi bai wa muhimmanci.”
Gwamnan ya sake jaddada ƙudirin babban bankin na tabbatar da tsarin musayar kuɗaɗen waje mai gaskiya, mai wadataccen kasuwa kuma wanda ya dogara da ƙa’idar mai saye da mai sayarwa cikin yardar juna.
Ya ce sauyin darajar naira zai ci gaba da kasancewa bisa yanayin kasuwa, yayin da sauye-sauyen da ake aiwatarwa za su ƙara wa masu zuba jari ƙwarin gwiwa, su inganta gasa tare da ƙarfafa daidaiton tattalin arziki na dogon lokaci.
Cardoso ya yi tsokaci kan ƙaddamar da Nigeria Overnight Financing Rate (NOFR), yana mai bayyana shi a matsayin wani muhimmin cigaba da zai ƙara tsare gaskiya a tsarin kuɗi.
A cewar sa, sabon ma’aunin yana nuna ainihin mu’amalolin ba da rancen kuɗi na dare tsakanin bankuna masu cikakken kariya, kuma zai taimaka wa Monetary Policy Rate (MPR) wajen inganta isar da manufofin kuɗi da kuma tallafa wa tsarin rage hauhawar farashin kayayyaki.
Da yake magana kan ci gaban tsarin biyan kuɗi a ƙasar, Cardoso ya bayyana cewa takardar kuɗin naira ta ₦100 ta tunawa, da ta ₦100 ta yau da kullum, da kuma dukkan takardun kuɗin naira da CBN ya amince da su, har yanzu suna da cikakken matsayi na kuɗin doka.
Ya ƙara da cewa makomar tsarin biyan kuɗi tana ƙara karkata zuwa fasahar zamani, yana mai jaddada cewa CBN na ci gaba da ƙoƙarin gina tsarin biyan kuɗi na zamani, mai tsaro, wanda kowa zai iya amfani da shi kuma ya dace da ƙa’idojin ƙasa da ƙasa.
Cardoso ya kuma bayyana farin ciki kan nasarar da CBN ya samu ta lashe Kyautar Babban Bankin Ƙasa ta 2026, yana mai cewa wannan karramawa shaida ce ta ƙwazo, ƙwarewa da jajircewar ma’aikata da shugabannin bankin.
Ya yaba wa kafafen yaɗa labarai na Nijeriya bisa goyon bayan da suke bai wa CBN, yana mai cewa wannan lambar yabo ta sake nuna irin nauyin da ke kan babban banki, kasancewar shawarwarin da yake yankewa suna shafar rayuwar miliyoyin ‘yan Nijeriya.
Gwamnan ya ƙara da cewa sauye-sauyen tattalin arzikin da ake aiwatarwa a Nijeriya suna ci gaba da samun karɓuwa da yabon ƙasashen duniya, saboda suna ƙarfafa daidaiton tattalin arziki, suna ƙara wa masu zuba jari ƙwarin gwiwa tare da shimfiɗa tubalin bunƙasar tattalin arziki mai ɗorewa.
