Shugaban Ƙasa, Bola Ahmed Tinubu, ya sanya hannu kan Sabuwar Dokar Shugaban Ƙasa kan Daidaita Harkokin Kadarorin Intanet (Virtual Assets Coordination Executive Order, 2026), domin haɗa kai tsakanin hukumomin gwamnati wajen sa ido kan harkokin kuɗaɗen intanet da sauran kadarorin zamani. Dokar ta fara aiki nan take bayan sanya hannu.
A cewar sanarwar Fadar Shugaban Ƙasa, dokar za ta magance matsalolin rashin daidaiton ayyukan hukumomi daban-daban, wanda ya bai wa wasu masu damfara damar yaudarar ‘yan ƙasa. Haka kuma, za ta taimaka wajen yaƙi da safarar kuɗaɗe ba bisa ƙa’ida ba, tallafa wa ta’addanci ta hanyar kuɗi, barazanar tsaron intanet, da kuma kare bayanan masu amfani.
Sabuwar dokar ta kafa Majalisar Kula da Kadarorin Intanet, wadda Babban Bankin Najeriya (CBN) zai jagoranta.
Hukumar Haraji ta Nijeriya (NRS) da Hukumar Kasuwar Hannayen Jari (SEC) za su kasance mataimakan shugabanni, yayin da Hukumar NFIU da Ofishin Mai Bai Wa Shugaban Ƙasa Shawara Kan Tsaro (ONSA) za su kasance mambobi. Haka kuma, an kafa Ofishin Kula da Kadarorin Intanet, wanda zai kasance ƙarƙashin CBN domin gudanar da ayyukan yau da kullum.
Sanarwar ta bayyana cewa dokar ba ta kafa sabuwar hukuma ba, kuma ba ta ƙwace ikon kowace hukuma ba. Maimakon haka, za ta tabbatar da haɗin kai tsakanin hukumomin domin sauƙaƙe rajistar masu gudanar da harkokin kadarorin intanet, tare da rufe gibin da masu gudanar da ayyukan ba bisa ƙa’ida ba ke amfani da shi wajen guje wa sa ido.
Haka zalika, CBN zai ƙaddamar da Regulatory Sandbox domin bai wa kamfanonin fasahar kuɗi damar gwada sabbin kayayyaki da ayyukan blockchain ƙarƙashin kulawa kafin a fitar da su kasuwa.
Ita ma Hukumar Haraji ta Nijeriya za ta fitar da manufofin haraji kan kadarorin intanet, yayin da Majalisar da aka kafa aka umurce ta da ta samar da tsarin aiwatar da dokar cikin kwanaki 30 domin tabbatar da fara aiki cikin gaggawa.
