Shugaba Bola Ahmed Tinubu ya bayyana zaɓen fidda gwani na jam’iyyar APC da aka gudanar a faɗin ƙasar nan a matsayin wata alama ta ƙarfi da bunƙasar dimokiraɗiyyar cikin gida a jam’iyyar mai mulki.
Tinubu ya bayyana haka ne bayan ya kaɗa ƙuri’ar sa a zaɓen fidda gwani na jam’iyyar da aka gudanar a mazaɓar Ikoyi-Obalende Ward L2 da ke Jihar Legas a ranar Asabar.
Shugaban ya ce tsarin ya bai wa membobin jam’iyya a matakin ƙasa damar taka rawar gani wajen zaɓen shugabannin su, yana mai cewa hakan na ƙara ƙarfafa tsarin dimokiraɗiyya.
Ya ce: “Wannan wata alama ce ta dimokiraɗiyyar cikin gida, kuma an gudanar da ita yadda aka tsara. Siyasar tushe ce wadda ke bai wa kowane mamba damar shiga cikin tsarin zaɓe.”
Ya ƙara da cewa an gudanar da zaɓen cikin lumana da tsari, lamarin da ya nuna cewa APC tana da ingantaccen tsarin gudanar da harkokin ta na cikin gida.
Tinubu ya yaba wa gwamnoni da shugabannin jam’iyyar a jihohi daban-daban kan yadda suka gudanar da matakan shirye-shiryen zaɓen, tun daga zaɓukan gundumomi zuwa tantance wakilai da rajistar mambobi.
A cewar sa, yadda aka gudanar da waɗannan matakai ya nuna cewa ana iya bai wa dimokiraɗiyya maki masu yawa a ƙasar nan.
Shugaban ya jaddada cewa APC za ta ci gaba da rungumar tsarin dimokiraɗiyya mai gaskiya da bai wa membobi damar zaɓar shugabannin su cikin ‘yanci, yana mai cewa hakan shi ne ginshiƙin cigaban siyasa mai ɗorewa.
Ya kuma yaba wa jami’an zaɓe, shugabannin jam’iyya da hukumomin tsaro bisa rawar da suka taka wajen tabbatar da zaman lafiya da gudanar da zaɓen cikin kwanciyar hankali.
Tinubu ya yi kira ga ‘yan Najeriya da su ci gaba da mara wa cibiyoyin dimokiraɗiyya baya tare da ƙarfafa haɗin kai na ƙasa.
Har ila yau, ya sake tabbatar da kudirin gwamnatin sa na ci gaba da bin tafarkin dimokiraɗiyya, inganta shugabanci da aiwatar da manufofin da za su inganta rayuwar al’ummar Nijeriya tare da tabbatar da zaman lafiyar siyasa a ƙasar nan.
