Masana tattalin arziki, manazarta harkokin kuɗi da kuma masu ƙananan sana’o’i sun yaba da matakin da Babban Bankin Nijeriya (CBN) ya ɗauka na barin kuɗin ruwa na Manufofin Kuɗi (MPR) a matakin kashi 26.5%.
Waɗanda aka sanya da su domin jin ra’ayin su dangane da adadin kuɗin ladar karɓar lamiɗo a bankuna, wato kashi 26.5%, sun bayyana matakin a matsayin mai taka-tsantsan, amma kuma na wajibi domin kare daidaiton tattalin arziki a daidai lokacin da hauhawar farashi ke ci gaba da zama barazana.
An bayyana wannan matsayar ne bayan taro na 305 na Kwamitin Manufofin Kuɗi (MPC), inda CBN ya bar dukkan manyan manufofin kuɗi a yadda suke ba tare da wani canji ba na ƙari ko ragin adadi ba.
Masu ruwa da tsaki sun bayyana cewa wannan mataki na nuna ƙoƙarin CBN domin daidaita tsakanin yaƙi da hauhawar farashi da kuma kauce wa ƙara wa ‘yan kasuwa matsin lamba, musamman ma waɗanda ke fama da tsadar rance, rashin daidaiton canjin kuɗi, tashin farashin makamashi da kuma raunin buƙatar masu saye.
Masana tattalin arziki da suka zanta da Nairametrics sun ce matakin na barin kuɗin ruwa yadda yake na nuna sabon salon taka-tsantsan a manufofin kuɗi na CBN, musamman bayan tsauraran matakan da aka ɗauka na dogon lokaci domin daidaita farashi da kasuwar canjin kuɗi.
Da dama daga cikin masu ruwa da tsaki sun bayyana cewa ci gaba da riƙe wannan ƙimar kuɗin ruwa zai bai wa ‘yan kasuwa da masu zuba jari sauƙi kaɗan, bayan fama da tsadar kuɗin gudanar da harkoki a cikin shekarar da ta gabata.
“Barin kuɗin ruwa yadda yake na aika saƙon taka-tsantsan da kwanciyar hankali. ‘Yan kasuwa da masu zuba jari sun sha wahala sosai saboda tsauraran matakan da aka ɗauka a bara. Wannan mataki zai bai wa tattalin arziki damar samun sauƙin karsashi da yin hoɓɓasa,” inji masanin tattalin arziki, Dakta Albert Miyaki.
Ya ƙara da cewa, “Kuɗin ruwa har yanzu yana da tsada sosai ga ‘yan kasuwa. Duk da cewa yaƙi da hauhawar farashi yana da muhimmanci, akwai kuma buƙatar tallafa wa samar da kayayyaki da ƙirƙirar ayyukan yi.”
Babban Daraktan Cibiyar Bunƙasa Kamfanoni Masu Zaman Kansu Kamfanoni (CPPE), Dakta Muda Yusuf, ya ce ƙungiyar “na maraba da matakin da CBN ya ɗauka na ci gaba da riƙe dukkan muhimman manufofin kuɗi a taro na 305 na Kwamitin Manufofin Kuɗi.”
Yusuf ya ƙara da cewa matakin na nuna “fahimta mai amfani, mai taka-tsantsan kuma mai zurfi kan matsalolin hauhawar farashi da tattalin arzikin Nijeriya ke fuskanta a yanzu.”
CPPE ta kuma yaba wa CBN bisa abin da ta kira kyakkyawan tafiyar da manufofin kuɗi da kuma ɗan daidaiton da aka samu a kasuwar canjin kuɗi a ‘yan watannin nan.
Masu ƙanana da matsakaitan sana’o’i a Nijeriya (SMEs) sun ce matakin na kauce wa sake ƙara kuɗin ruwa zai taimaka wajen rage matsin lamba da suke ciki.
Da dama daga cikin SMEs sun koka da tsadar rance, inda kuɗin ruwa daga bankunan kasuwanci ya haura kashi 30% a lokuta da dama can baya.
Wata ‘yar kasuwa daga Abuja, Misis Chioma Nwosu, ta ce kamfanoni da dama na fama da rashin samun rance mai sauƙi da suke buƙata domin faɗaɗa harkokin su da kuma ci gaba da gudanar da ayyukan su.
“Yawancin SMEs ba za su iya rayuwa da kuɗin ruwa sama da kashi 30% ba.
A baya, kamfanoni da dama sun fara rage ma’aikata saboda sun kasa samun kuɗin sayen kaya, kayan aiki ko kuma faɗaɗa sana’a. Aƙalla, rashin ƙara kuɗin ruwa a wannan karo ya kawo ɗan sauƙi,” inji ta.
Wani masanin harkokin zuba jari, Tunde Adeyemi, ya ce matakin MPC na iya ƙara wa masu zuba jari ƙwarin gwiwa tare da tallafa wa harkokin kasuwar hannayen jari saboda samar da tabbacin manufofi.
A fahimtar sa, “Yan kasuwa sun damu da ci gaba da tsaurara manufofin kuɗi. Barin kuɗin ruwa yadda yake zai kawo tabbaci kuma zai iya jawo hankalin masu zuba jari da ke jiran ganin yadda abubuwa za su kaya.”
Sai dai masana sun jaddada cewa yanayin kuɗin ruwa a yanzu har yanzu yana da tsauri ga fannoni masu samar da kayayyaki kamar masana’antu, noma da ƙananan sana’o’i waɗanda suka dogara sosai kan samun rance mai sauƙi.
Masu ruwa da tsaki sun ce matakin na iya taimakawa wajen daidaita tunanin masu zuba jari da kuma kiyaye amincewa da tsarin manufofin kuɗi na Nijeriya a daidai lokacin da hauhawar farashi, matsin canjin kuɗi da kuma matsalolin siyasar duniya ke ci gaba da haifar da rashin tabbas ga tattalin arzikin ƙasashe masu tasowa.
SMEs sun kuma bayyana cewa matsalolin tsaro, rashin ingantattun hanyoyi da ababen more rayuwa, matsalolin sufuri da kuma tsadar makamashi na daga cikin manyan abubuwan da ke haddasa hauhawar farashi.
Ra’ayin gama gari tsakanin masu ruwa da tsaki shi ne, duk da cewa dakatar da ƙara kuɗin ruwa a yanzu abu ne mai kyau, akwai yiwuwar a buƙaci rage kuɗin ruwa a hankali idan hauhawar farashi ya ci gaba da sauka.
CBN ya bar MPR a matakin kashi 26.5% ne bayan rage shi da maki 50 daga kashi 27% a taron MPC da ya gabata da aka gudanar a watan Fabrairun 2026.
Kwamitin ya kuma bar sauran muhimman manufofin kuɗi yadda suke.
Da ma tun tsawon mako ɗaya kafin zuwan ranar taron, sai da masana kasuwannin kuɗi suka yi hasashen cewa MPC zai bar kuɗin ruwa yadda yake, saboda matsin hauhawar farashi da rashin tabbas a tattalin arzikin duniya.
CBN ya ci gaba da bin salon taka-tsantsan a manufofin kuɗi domin yaƙi da hauhawar farashi da kuma daidaita darajar naira.
