Hukumar Yaƙi da Yi Wa Tattalin Arzikin Ƙasa Ta’annati (EFCC) ta kama tsohon Ministan Wutar Lantarki, Saleh Mamman, wanda ya tsere, a unguwar Rigasa da ke cikin birnin Kaduna a yau.
Hukumar ta bayyana cewa ta kama Mamman da safiyar yau ne bayan an shafe makonni tana neman sa ruwa a jallo, tana sa ido sosai tare da tattara bayanan sirri ta hannun jami’an ta.
Da yake ganawa da manema labarai kan kamen, Shugaban EFCC, Ola Olukoyede, ya bayyana cewa tsohon ministan ya ɓuya ne bayan da Babbar Kotun Tarayya da ke Abuja ta same shi da laifin cin hanci da rashawa.
Ya ce: “A ranar 7 ga Mayu, 2026, Mai Shari’a James Omotosho ya sami Mamman da laifi a kan dukkan tuhume-tuhume 12 da suka shafi karkatar da kuɗaɗen da aka ware domin ayyukan samar da wutar lantarki na ruwa na Zungeru da Mambilla. Kotun ta same shi da laifi ba tare da yana gaban kotu ba, bayan ta amince da hujjar hukumar cewa masu gabatar da ƙara sun tabbatar da laifin sa ba tare da wata shakka mai ma’ana ba.
“A gare mu, yana da matuƙar muhimmanci a tabbatar da cewa wanda aka yanke wa hukunci ya fara zaman gidan yari, duba da yadda muke ɗaukar yaƙi da cin hanci da rashawa da muhimmanci. Wannan ƙudiri ne ya sa muka tura jami’an leƙen asiri domin gano inda yake tare da kama shi. Za mu bi hanyoyin da suka dace domin mayar da shi gidan gyaran hali.”
A hukuncin da ya yanke, Mai Shari’a Omotosho ya ce EFCC ta tabbatar da cewa Mamman da abokan hulɗar sa sun karkatar da aƙalla Naira biliyan 22 da aka ware domin aiwatar da manyan ayyukan samar da wutar lantarki.
Kotun ta kuma ce ɓangaren kariya ya kasa gabatar da hujjoji masu inganci da za su rusa ƙarar masu gabatar da ƙara.
Alƙalin ya yi Allah-wadai da karkatar da kuɗaɗen jama’a da aka ware domin ayyukan samar da wutar lantarki na Zungeru da Mambilla, yana mai bayyana hakan a matsayin babban cin amanar ƙasa.
Ya kuma lura da cewa wanda aka yanke wa hukuncin ya yi amfani da kamfanonin bogi da wasu abokan hulɗa domin wawure kuɗaɗen da aka ware domin muhimman ayyukan more rayuwar ƙasa.
Mamman, wanda ya kasance Ministan Wutar Lantarki tsakanin shekarar 2019 zuwa 2021 a gwamnatin tsohon Shugaban Ƙasa Muhammadu Buhari, shi ne ke kula da ɓangaren wutar lantarki na Nijeriya da manyan ayyukan samar da wutar lantarki na ruwa, ciki har da ayyukan Mambilla da Zungeru.
Bayan samun sa da laifi, kotun ta bayar da umurnin a kama shi kuma a gurfanar da shi a ranar 13 ga Mayu, 2026, domin yanke masa hukunci.
Sai dai bai bayyana a kotu a ranar da aka tsara ba, lamarin da ya sa kotun ta ci gaba da yanke masa hukunci ba tare da halartar sa ba.
Daga bisani, Mai Shari’a Omotosho ya yanke wa Mamman hukuncin ɗaurin shekaru bakwai-bakwai a tuhume-tuhume na 1, 2, 3, 6, 7, 8, 9, 10, 11 da 12, ba tare da zaɓin tara ba.
An kuma yanke masa hukuncin ɗaurin shekaru uku a tuhuma ta 4 tare da zaɓin biyan tara ta Naira miliyan 10, sannan ɗaurin shekaru biyu a tuhuma ta 5 ba tare da zaɓin tara ba.
Kotun ta kuma ba da umurnin cewa hukuncin ya kasance a jere, wanda hakan ya kai jimillar shekaru 75 a gidan yari.
Baya ga wannan hukuncin, Mamman na kuma fuskantar wata shari’ar cin hanci da rashawa a Babbar Kotun Babban Birnin Tarayya, Abuja, kan zargin damfarar Naira biliyan 31.
A ranar 11 ga Mayu, 2026, Mai Shari’a Maryanne Anenih ta bayar da sammacin kama shi bayan ya kasa bayyana a gaban kotu a shari’ar da ta shafe shi da wasu mutum bakwai.
