Rundunar Sojin Amurka ta Afrika (AFRICOM) ta fitar da bidiyon farmakin soji da ya kai ga kashe kwamandan ƙungiyar Da’ish (ISIS), Abu-Bilal al-Minuki.
A cikin wata sanarwa da AFRICOM ta fitar a yau Asabar, ta ce an gudanar da farmakin ne bisa umurnin Shugaban Amurka da Sakataren Yaƙi, tare da haɗin gwiwa ta kusa da gwamnatin Nijeriya.
Ta ce bayanan farko sun nuna cewa an kashe ‘yan ta’adda da dama a yayin farmakin.
Rundunar ta ce an kai harin ne kan wata babbar cibiyar ISIS a arewa maso gabashin Nijeriya, tana mai bayyana hakan a matsayin wani ɓangare na ci gaba da haɗin gwiwar yaƙi da ta’addanci a yankin Tafkin Chadi.
“Bisa umarnin Shugaban Amurka da Sakataren Yaƙi, tare da haɗin gwiwa da gwamnatin Nijeriya, Rundunar Sojin Amurka ta Afrika ta gudanar da wani farmaki kan ISIS a arewa maso gabashin Nijeriya a ranar 16 ga Mayu, 2026.
“Binciken farko na rundunar ya nuna cewa an kashe ‘yan ta’adda da dama, ciki har da Abu-Bilal al-Minuki, daraktan ayyukan duniya na ISIS, da kuma wasu manyan shugabannin ƙungiyar. Babu wani sojan Amurka da ya ji rauni.
“Kamar yadda Shugaba Trump ya bayyana a daren jiya, AFRICOM tare da haɗin gwiwa da Sojojin Nijeriya sun gudanar da nasarar aiki cikin jarumtaka wanda ya kai ga hallaka Abu-Bilal al-Minuki da wasu shugabannin ISIS da dama,” inji Janar Dagvin Anderson na Rundunar Sojin Sama ta Amurka, kwamandan AFRICOM.
“Wannan farmaki ya nuna muhimmancin haɗin gwiwar Amurka da Nijeriya, kuma ya samu ne sakamakon haɗin kai da daidaiton aiki tsakanin rundunonin mu a watannin baya-bayan nan. Ku sani sarai, ƙasashen mu biyu za su ci gaba da bibiyar barazanar ta’addanci ba tare da sassauci ba tare da kawar da su, kuma muna da ƙudirin kare al’ummar mu da muradun mu.”
Rahotanni sun ce Al-Minuki na bayar da shawarwari na dabaru ga cibiyar ISIS ta duniya kan harkokin yaɗa labarai da kuɗaɗe, da kuma bunƙasa da ƙera makamai, bamabamai da jiragen sama marasa matuƙi.
An bayyana shi a matsayin ɗaya daga cikin ‘yan ta’adda mafi hatsari a duniya, wanda ke da dogon tarihin shirya hare-hare da kuma jagorantar garkuwa da mutane.
