Hukumar Yaki da Cin Hanci da Rashawa mai zaman kanta, wato ICPC, ta shigar da wata takardar martani domin ƙalubalantar sabuwar buƙatar beli da tsohon gwamnan Jihar Kaduna, Malam Nasir El-Rufai, ya gabatar a shari’ar da ake yi a gaban Babbar Kotun Jihar Kaduna.
A zaman sauraron ƙarar da aka ci gaba da yi a yau Talata, lauyan wanda ake ƙara, Mista Ubong Akpang, ya sanar da kotun cewa akwai wata buƙatar beli da aka gabatar, yana mai jaddada cewa batun ya shafi ‘yancin wanda ake ƙara.
Ya ƙara da cewa an kammala gabatar da dukkan takardun da ake buƙata tare da miƙa su yadda ya dace, yana mai bayyana shirin su na ci gaba da sauraron ƙarar.
Sai dai lauyan ICPC, Mista Ibrahim Mukhtar, ya shaida wa kotun cewa yanzu ne kawai aka ba shi ƙarin takardar rantsuwar da wanda ake ƙarar ya gabatar don goyon bayan buƙatar belin, kuma zai buƙaci lokaci domin nazarin sababbin takardun.
Bayan wannan matsayar, sai kotun mai girma ta ɗage sauraron shari’ar zuwa ranar 13 ga Mayu, 2026 domin sauraron buƙatar belin.
Idan kun tuna, kotun ta riga ta ƙi bai wa El-Rufai beli a wata buƙatar da aka gabatar a baya.
Mai Shari’a D.H. Khobo ya bayyana cewa wanda ake ƙarar bai gabatar da ƙarin takardar rantsuwa ba domin ƙalubalantar martanin ICPC, wadda ta ƙunshi wasu sababbin bayanai.
Waɗannan bayanai sun haɗa da yiwuwar tserewa saboda tasirin sa da albarkatun da yake da su, zargin hana jami’ai gudanar da kamar sa a Filin Jirgin Sama na Nnamdi Azikiwe da ke Abuja, ƙin miƙa takardun tafiyar sa da na’urorin sa domin bincike, da kuma damuwa kan yiwuwar katsalandan ga shaidu da hujjoji.
A hukuncin da ta yanke, kotun ta jaddada cewa bayar da beli yana ƙarƙashin ikon kotu ne kuma dole ne ya kasance cikin muradun adalci.
Mai Shari’a Khobo ya ce matsayin wanda ake ƙarar a cikin al’umma na iya ba shi damar yin katsalandan ga binciken da ake yi, musamman ganin cewa har yanzu akwai wasu da ake zargi da ba a kama ba.
Kotun ta lura cewa wanda ake ƙarar bai ƙalubalanci manyan zarge-zargen da ke cikin takardar martanin masu gabatar da ƙara ba, saboda haka aka ɗauke su a matsayin amintattu. Haka kuma kotun ta yi watsi da iƙirarin rashin lafiya da aka gabatar ba tare da hujjoji ba.
Saboda haka, kotun ta ƙi bai wa wanda ake ƙarar beli, tare da umurtar a ci gaba da tsare shi a hannun ICPC har zuwa lokacin da za a fara shari’ar, sannan ta bayar da umurnin gaggauta sauraron ƙarar.
Duk da haka, lauyoyin masu kare El-Rufai sun ci gaba da gabatar da sabuwar buƙatar beli.
Tun daga lokacin, ICPC ta shigar da martanin ta na adawa da sabuwar buƙatar belin, tana mai jaddada aniyar ta ta tabbatar da an yi adalci bisa tanadin doka.
Shugaban Sashen Yaɗa Labarai da Hulɗa da Jama’a na ICPC, J. Okor Odey, ya bayyana a cikin wata sanarwar manema labarai cewa hukumar tana tabbatar wa da jama’a da ci gaba da jajircewar ta wajen gurfanar da masu laifin cin hanci cikin ƙwarewa tare da tabbatar da bin doka da ƙa’ida.
