Fadar Shugaban Ƙasa ta bayyana dalilin da ya sa Shugaba Bola Ahmed Tinubu ya tsaya a filin jirgin sama lokacin da ya kai ziyara Jos, jihar Filato, tana mai cewa hakan ya faru ne sakamakon rashin isasshen lokaci da kuma ƙalubalen gudanarwa.
Idan kun tuna, Shugaban ya gana da iyalan waɗanda aka kashe lokacin da ‘yan bindiga suka kai hari a Angwan Rukuba da ke Ƙaramar Hukumar Jos ta Arewa a Jihar Filato, a ranar Lahadi.
Yayin da yake jawabi ga waɗanda aka kawo domin ganawa da shi a filin jirgin saman, Shugaban Ƙasa ya ce: “Ba ku da wutar lantarki a filin jirgin sama, kuma dole ne in tashi cikin mintuna 10 masu zuwa. Ga waɗanda abin ya shafa, babu abin da zan iya ba ku, ko da kuɗi ne na miliyoyi, sai dai in yi muku ta’aziyya kuma in yi muku alƙawarin cewa wannan lamari ba zai sake faruwa ba.”
Ɗakin taron ya cika da magoya bayan siyasa, sarakunan gargajiya, jami’an tsaro, da sauran su.
Tsayawar Tinubu a filin jirgin sama ta haifar da ce-ce-ku-ce mai yawa, inda masu suka suka zargi Shugaban da rashin adalci ga iyalan da ke cikin jimami.
Daga cikin waɗanda suka fara sukar lamarin akwai jagoran ‘yan adawa kuma tsohon Mataimakin Shugaban Ƙasa, Atiku Abubakar, wanda ya mayar da martani ta bakin mai taimaka masa, Phrank Shaibu.
A cewar sa, abin da ya faru ya mayar da wannan mummunan lamari zuwa wani “abin kallo da aka tsara,” inda aka fifita nuna hoto da salo sama da tausayi da mutuntawa.
Sai dai a cikin wata sanarwa da ya fitar a ranar Juma’a, Mai Bai wa Shugaban Ƙasa Shawara na Musamman kan Yaɗa Labarai da Dabaru, Bayo Onanuga, ya ce tsarin tafiyar Shugaban na ranar Alhamis tun farko ya haɗa da karɓar Shugaban ƙasar Chadi, Mahamat Idriss Déby Itno, a Fadar Shugaban Ƙasa, kafin daga bisani ya wuce Iperu a Jihar Ogun.
Amma bayan wani bayani na tsaro da Gwamnan Jihar Filato, Caleb Mutfwang, ya gabatar, sai Shugaba Tinubu ya dakatar da tafiyar sa zuwa Ogun, inda ya shirya cikin gaggawa ya tafi Jos a daren ranar.
Duk da wannan sauyi, Shugaban bai samu damar sauya lokacin ganawar manyan shugabannin ƙasashen biyu ba, wadda ta mayar da hankali kan ƙarfafa haɗin gwiwar tsaro tsakanin Nijeriya da Chadi.
A cewar Onanuga, ganawar ta ɗauki lokaci fiye da yadda aka tsara, lamarin da ya jinkirta tashin Tinubu zuwa Jos.
Ya ce: “Da isar sa Jos, ziyarar ta fuskanci wasu ƙalubalen gudanarwa. Duk da cewa nisan hanya daga filin jirgin sama zuwa cikin garin Jos kusan minti 40 ne, filin jirgin ba ya karɓar saukar jirage da daddare saboda rashin kayan jagorancin sauka. Wannan ya sa ba zai yiwu a shiga gari, a gana da waɗanda abin ya shafa kai-tsaye, sannan a dawo filin jirgin kafin dare ya yi ba.
“Saboda haka, jami’an gwamnati na jiha da na tarayya suka yanke shawarar kawo wakilan al’ummar da abin ya shafa zuwa wani ɗaki da ke kusa da filin jirgin saman domin Shugaban ya gana da su cikin gaggawa, tare da bin ƙa’idojin zirga-zirgar jirage.
“Daga cikin waɗanda ke wurin akwai Ministan Tsaro, Babban Hafsan Soja, da Sufeto Janar na ‘Yan Sanda, waɗanda suka kai ziyara Rukuba, cibiyar rikicin.
“Shugaba Tinubu ya tura wannan tawagar ta manyan jami’ai zuwa Rukuba, ciki har da Babban Mataimaki na Musamman kan hulɗa da al’umma, domin gudanar da muhimman shirye-shirye na tsaro da hulɗa da jama’a kafin zuwan sa.
“Bayan ta’aziyya da ya yi ga waɗanda abin ya shafa, manufar Shugaba Tinubu ita ce tattaunawa da manyan masu ruwa da tsaki a Jihar Filato kan yadda za a kawo ƙarshen rikicin da ya daɗe yana faruwa tsawon shekaru, wanda ya jawo asarar rayuka da dukiyoyi ba tare da dalili ba.”
Onanuga ya ƙara da cewa ziyarar Tinubu zuwa Jos ba wai kawai ta alama ba ce, illa wani “muhimmin mataki na dabaru a matakin ƙoli domin haɗa dukkan masu ruwa da tsaki wajen magance tushen rikici da rashin tsaro a jihar.
“Ya gana da waɗanda abin ya shafa, ya yi musu ta’aziyya, ya kuma saurare su.
“Haka kuma ya saurari shugabannin al’umma, ya kuma tabbatar musu da cewa Gwamnatin Tarayya za ta tabbatar da adalci tare da kawo ƙarshen wannan zagayowar tashin hankali.
“Ya yi alƙawarin girka kyamarori 5,000 masu amfani da fasahar AI domin sa ido a cikin birnin da kuma sauƙaƙa gano da kama masu tada hankali.
“Haka kuma, Shugaban ya gayyaci shugabannin al’umma zuwa Abuja domin ci gaba da tattaunawa kan yadda za a samar da mafita mai ɗorewa ga rikicin da ke yawan faruwa a jihar.
“Taron, wanda aka watsa kai-tsaye, ya kasance cikin natsuwa da kwantar da hankali, wanda ya ƙara wa mazauna yankin ƙwarin gwiwa.
“Shugaba Tinubu ya cimma manufar ziyarar sa duk da ƙoƙarin masu suka na ƙoƙarin raina ta. Ya isar da saƙo mai ƙarfi: dole ne a gina zaman lafiya mai ɗorewa tare da jama’a, ba a tilasta masu ba.”
