Gwamnatin Tarayya na ƙara ƙaimi wajen samar da hanyoyin makamashi masu sauƙi da aminci a fannin sufuri, inda aka riga aka samar da cibiyoyi 41 na sauya tsarin motoci zuwa amfani da iskar gas (Compressed Natural Gas, CNG) a Jihar Kano.
Manufar shirin, wanda Shugaban Ƙasa Bola Ahmed Tinubu ya samar, ita ce rage tsadar sufuri da ƙarfafa tsaron makamashi ta hanyar amfani da makamashi mai tsafta.
A wata ziyara da ya kai wurin ajiyar kayan sauya motoci da ke No. 12 Kakara Warehouse, Titin Haɗeja a Kano, a yau Lahadi, Babban Jami’in Shirin CNG na Ƙasa (PCNGi), Barr. Ismaeel Ahmad, ya bayyana cewa a halin yanzu akwai kimanin kayan sauya mota 3,524 a cikin rumbun, waɗanda suka haɗa da tankuna masu girman lita 30, 65 da 75, kuma a shirye suke domin raba wa cibiyoyin da aka amince da su a faɗin jihar.
Ya ce cibiyoyin suna da alhakin sauya motoci da a-daidaita-sahu daga man fetur zuwa amfani da CNG, matakin da ake sa ran zai rage kuɗin sufuri ga direbobi da fasinjoji.
A cewar sa, a yanzu cibiyoyi 41 suna karɓar kayan daga rumbun domin hanzarta aikin sauya tsarin motoci tare da faɗaɗa damar cin gajiyar shirin.
Wasu daga cikin cibiyoyin sun haɗa da Trade Source Integrated Concept, PKM Global Resource Ltd, Drive Green, Safe Auto Gas Ltd, Dazle Integrated Service, Go CNG Now Ltd, SJ Resource Limited, Arus CNG Conversion Centre, Fonnd Motor Manufacturing, Enormous International Centre, Danfyrt Autos Ltd, Afriks Ltd, AMK Integrated, ABG Oil & Gas, Green Africa Solutions, Amani Automobile Ltd, Ahad Projects Ltd, Pro-Prestige Ltd., Nuts and Bolt, da sauran su.
Shugaban na PCNGi ya sake jaddada aniyar Gwamnatin Tarayya na faɗaɗa shirin a faɗin ƙasar nan, yana mai cewa hakan zai taimaka wajen rage tasirin tsadar mai tare da inganta amfani da makamashi mai tsafta.
Ya ƙara da cewa yawaitar cibiyoyin a Kano ya nuna yadda kamfanoni masu zaman kan su ke ba da gudunmawa tare da karɓuwar shirin daga jama’a.
Masu ruwa da tsaki a ɓangaren sufuri sun yaba wa shirin, suna masu cewa lokaci ya yi da ya dace, musamman wajen rage kashe kuɗi da inganta rayuwar al’umma.
Ana sa ran wannan faɗaɗawar za ta ƙara bunƙasa harkokin kasuwanci ta hanyar rage kuɗin jigilar kaya da fasinjoji, tare da tallafa wa ƙananan ’yan kasuwa da haɓaka tattalin arzikin Jihar Kano baki ɗaya.
