Shugaban Rukunin Kamfanonin Ɗangote, Alhaji Aliko Ɗangote, ya miƙa ƙorafi kan Darakta-Janar na Hukumar Kula da Harkokin Mai na Cikin Teku ta Nijeriya (NMDPRA), Injiniya Ahmed Farouk, ga Hukumar Yaƙi da Cin Hanci da Rashawa da Sauran Laifuka Masu Alaƙa (ICPC), inda ya zarge shi da cin hanci da rashawa da almundahana ta kuɗi.
A cikin ƙorafin da ya miƙa a ranar 16 ga Disamba, Ɗangote ya nemi a kama, a binciki kuma a gurfanar da Ahmed a kotu bisa zargin rayuwa sama da ƙarfin albashin sa a matsayin sa na ma’aikacin gwamnati.
A ƙorafin da ofishin Shugaban ICPC, Musa Adamu Aliyu (SAN), ya karɓa, Shugaban Rukunin Kamfanonin Ɗangote ɗin ya zargi shugaban na NMDPRA da kashe kuɗi ba tare da hujjar halastacciyar hanyar samun kuɗin ba, da ya kai sama da dala miliyan 7, domin biyan kuɗin karatun ’ya’yan sa huɗu a makarantu daban-daban a ƙasar Switzerland na tsawon shekaru shida.
A cikin takardar ƙorafin, Ɗangote ya ambaci sunayen ’ya’yan huɗu da makarantun da suke karatu a Switzerland, tare da adadin kuɗin da aka biya wa kowannen su, domin tabbatar da zarge-zargen da kuma sauƙaƙa tantancewa daga hukumar ta yaƙi da cin hanci.
Ya yi zargin cewa Farouk Ahmed yana amfani da hukumar NMDPRA wajen wawurewa da karkatar da kuɗaɗen jama’a domin amfanin kan sa da cimma muradun kan sa na sirri, abin da ya jawo hayaniya da zanga-zanga daga ƙungiyoyi daban-daban a kwanakin baya, wanda ya cutar da al’ummar Nijeriya.
Ɗangote ya ƙara da cewa Farouk Ahmed, a tsawon rayuwar sa ta balaga, ya yi aiki ne a ɓangaren gwamnati a Nijeriya, kuma jimillar kuɗin shigar sa a tsawon shekarun ba ta kai kusa da dala miliyan 7 ba, wanda ake zargin an karkatar da su daga baitulmalin jama’a domin biyan kuɗin karatun ’ya’yan sa matasa a ƙasar waje.
“Babu shakka cewa waɗannan bayanai da suka shafi cin zarafin muƙami, karya Dokar Ladabi ga Ma’aikatan Gwamnati, tara dukiya ta haram, da almundahana, manyan ayyukan cin hanci da rashawa ne, waɗanda hukumar ku (ICPC) take da ikon doka a ƙarƙashin sashe na 19 na Dokar ICPC, don bincike da gurfanarwa,” inji Ɗangote.
Ya ƙara da cewa: “Bayan samun nasarar gurfanar da irin wannan mutum, a ƙarƙashin sashe na 19 na Dokar ICPC, yana fuskantar hukuncin ɗaurin shekaru biyar a gidan yari ba tare da zaɓin tara ba.
“Muna faɗa da ƙarfin gwiwa cewa ICPC tana da matsayi mai ƙarfi tare da sauran hukumomi ’yan’uwan ta wajen gurfanar da laifukan kuɗi da sauran laifukan cin hanci da rashawa, kuma da zarar an tabbatar da hujjar farko (prima facie), kotuna ba sa jinkirin hukunta mai laifi.
“Saboda haka, muna kiran hukumar a ƙarƙashin jagorancin ku da ta binciki ƙorafin cin zarafin muƙami da cin hanci da rashawa da ake yi wa Injiniya Farouk Ahmed, tare da gurfanar da shi idan aka same shi da laifi.
“Ba mu da wata shakka cewa kasancewar wannan lamari yana gaban jama’a, hukumar ba za ta rufe ido ba, sai ta ɗauki mataki mai tsauri domin tabbatar da adalci da kare kyakkyawan mutuncin gwamnatin Shugaba Bola Ahmed Tinubu.”
Ɗangote dai ya sha alwashin kasancewa a shirye domin gabatar da hujjoji don tabbatar da zarge-zargen sa na tara dukiya ta hanyar haram da cin zarafin muƙami da yake yi wa Injiniya Farouk Ahmed.
