Jam’iyyar APC ta zaɓi Ministan Harkokin Jinƙai da Rage Talauci, Farfesa Nentawe Goshwe Yilwatda, a matsayin sabon Shugaban jam’iyyar na ƙasa.
Zaɓen ya gudana ne a ranar Alhamis yayin zaman Kwamitin Zartarwa na Ƙasa (NEC) na jam’iyyar, inda aka zaɓe shi ba tare da hamayya ba don maye gurbin Dakta Abdullahi Umar Ganduje, wanda ya sauka daga muƙamin bisa wasu dalilai na lafiya.
Yilwatda, wanda aka haifa a ranar 8 ga Agusta, 1968 a garin Dungung, Ƙaramar Hukumar Kanke ta Jihar Filato, fitaccen masani ne a fannin aikin injiniyan na’ura mai ƙwaƙwalwa da lantarki.
Ya yi karatun sa na farko a Jami’ar Noma ta Tarayya da ke Makurdi, sannan ya samu digirin sa na biyu daga ATBU Bauchi, da kuma digirin digirgir daga Jami’ar Nijeriya da ke Nsukka.
Ya kwashe sama da shekaru 26 yana koyarwa da gudanar da manyan ayyuka a jami’o’i, kuma ya taka rawa a matsayin daraktan ICT na farko a Jami’ar Makurdi.
Baya ga aikin ilimi, Farfesan ya taka rawa a ɓangaren ƙirƙire-ƙirƙire da sauyi ta fannin fasaha a ciki da wajen gwamnati. A matsayin sa na ƙwararre a harkar sadarwa da fasahar zamani, ya yi aiki da manyan ƙungiyoyin duniya irin su EU, UNICEF, Bankin Duniya da Techville USA.
A shekarar 2017, ya zama Kwamishinan Zaɓe na INEC, inda ya kawo muhimman sauye-sauye a tsarin zaɓe da suka haɗa da tsarin kaɗa ƙuri’a ga ’yan gudun hijira da masu buƙata ta musamman.
Yanzu da ya zama shugaban APC na ƙasa, Yilwatda ya shigo da ƙwarewa ta musamman, hangen nesa, da sadaukarwa da zai amfani jam’iyyar da ƙasa baki ɗaya.
A matsayin sa na shugaban kamfen ɗin Tinubu/Shettima a Jihar Filato, kuma Ministan Jinƙai, yana da zurfin alaƙa da ɓangarori da dama na gwamnati da ƙungiyoyin cigaba, wanda ake da ran hakan zai taimaka wajen jagorantar jam’iyyar cikin haɗin kai da nasara.
