Shugaba Bola Ahmed Tinubu ya bada sanarwar kawo ƙarshen dokar ta-ɓaci da ya sanya a Jihar Ribas a ranar 18 ga Maris, 2025.
A cikin jawabin da ya gabatar daga fadar shugaban ƙasa a yau, Tinubu ya ce an kafa dokar ta-ɓacin ne sakamakon rikicin siyasa da ya yi ƙamari tsakanin Gwamnan jihar, Siminalayi Fubara, da ’yan majalisar dokokin jihar.
Shugaban ya bayyana cewa rikicin ya kai ga gaza gudanar da harkokin gwamnati, inda aka samu rarrabuwar kawuna tsakanin ’yan majalisar, guda huɗu na goyon bayan gwamna yayin da sauran 27 ke goyon bayan kakakin majalisar.
Ya ce hakan ya hana gabatar da kasafin kuɗi, abin da ya haddasa durƙushewar gwamnati gaba ɗaya, lamarin da Kotun Ƙoli ta tabbatar da shi a hukuncin ta, inda ta bayyana cewa babu gwamnati a Jihar Ribas.
Tinubu ya ce duk da ƙoƙarin sa da na wasu ’yan Najeriya don shawo kan rikicin, ɓangarorin biyu sun ƙi sasantawa, lamarin da ya tilasta shi amfani da sashe na 305 na kundin tsarin mulkin 1999 wajen kafa dokar ta-ɓaci.
“Idan ban ɗauki wannan mataki ba a lokacin da aka kai ga mummunan halin da gwamnati ta gaza aiki, to da na gaza wajen kare zaman lafiya da tsaron jama’a,” inji shi.
Ya kuma gode wa Majalisar Tarayya, sarakunan gargajiya da jama’ar Ribas bisa goyon bayan da suka bayar yayin dokar ta-ɓacin.
Shugaban Ƙasa ya ce bayan samun sabon yanayi na fahimtar juna da shirye-shiryen komawa ga tsarin dimokiraɗiyya, babu dalilin ci gaba da dokar ta-ɓacin bayan cikar watanni shida.
Saboda haka, daga misalin ƙarfe 12 na daren 17 ga Satumba, 2025, dokar ta-ɓacin ta ƙare. Gwamna Fubara, mataimakiyar sa Ngozi Nma Odu, da kakakin majalisar, Martins Amaewhule, tare da ’yan majalisar za su koma bakin aiki daga ranar 18 ga Satumba, 2025.
Tinubu ya yi amfani da damar wajen tunatar da sauran gwamnonin jihohi da majalisun dokoki cewa zaman lafiya da kyakkyawan shugabanci su ne tushen kawo romon dimokiraɗiyya ga ’yan ƙasa.
