Nijeriya ta bayyana rashin jin daɗin ta kan matakin da gwamnatin Amurka ta ɗauka na sanya ƙasar nan cikin jerin ƙasashen da ake ganin suna take ’yancin yin addini.
Ministan Yaɗa Labarai da Wayar da Kai na ƙasa, Alhaji Mohammed Idris, shi ne ya bayyana haka a wurin taron manema labarai da aka gudanar a Cibiyar ‘Yan Jarida ta Ƙasa a Abuja a yau Laraba.
Idris ya ce gwamnatin Nijeriya ta san irin damuwar da wannan mataki na Amurka ya haifar, musamman ma bayan furucin Shugaban Amurka, Donald Trump, wanda ya yi barazanar kawo wa Nijeriya farmaki bisa hujjar bada kariya ga Kiristoci.
Ministan ya jaddada cewa matsalolin tsaro da Nijeriya take fuskanta ba su taɓa bambance tsakanin Musulmi da Kirista ba, inda ya ce: “Ta’addanci ba ya da addini, ba ya kallon ƙabila ko matsayi. Yaƙi ne da dukkan mutanen da ke son zaman lafiya a Nijeriya.”
Ya ƙara da cewa gwamnati na ci gaba da ɗaukar matakai na zahiri don kawo ƙarshen matsalar tsaro, kuma tun bayan hawan sa mulki a watan Mayu 2023, Shugaba Bola Ahmed Tinubu ya nuna tsantsar niyyar sa ta tabbatar da tsaro a faɗin ƙasar nan.
A cewar ministan, sojojin Nijeriya sun kashe sama da ’yan ta’adda 13,500, tare da kama fiye da 17,000 da ake ci gaba da binciken su da shari’a a kan su, haka kuma an ceto mutum 9,800 da aka yi garkuwa da su, ciki har da mata da yara.
Idris ya bayyana cewa sauyin da aka yi wa manyan hafsoshin tsaro da kuma sake tsara tsarin tsaro a ƙasar suna daga cikin matakan da Tinubu ya ɗauka don kawo ƙwarin gwiwa da inganta haɗin kai tsakanin hukumomin tsaro.
“Manufar ita ce a tabbatar da cewa kowace kusurwa ta Nijeriya ta samu tsaro, kuma kowanne ɗan ƙasa ya rayu cikin kwanciyar hankali,” inji shi.
Idris ya kuma bayyana cewa an samu raguwar hare-haren ta’addanci sosai, musamman a Arewa-maso-gabas da Arewa-maso-yamma, tare da raunin kashi 80 cikin 100 na hare-haren masu tsattsauran ra’ayi a Kudu-maso-gabas.
Gwamnati ta ce an kama wasu manyan shugabannin ƙungiyoyin ta’addanci kamar Mahmud Muhammad Usman da Abubakar Abba na ƙungiyar Ansaru, da kuma Khalid Al-Barnawi, wanda ake zargi da kitsa harin ofishin Majalisar Ɗinkin Duniya a Abuja a 2011.
Ya ƙara da cewa mutum 125 daga cikin waɗanda ake zargi da ta’addanci sun riga sun samu hukunci, yayin da wasu ɗaruruwan suke ci gaba da fuskantar shari’a a kotuna daban-daban.
Ministan ya ce duk da matakin Amurka, Nijeriya za ta ci gaba da aiki tare da Amurka da sauran ƙasashe domin kawar da ta’addanci.
Ya ce: “Muna fatan Amurka za ta fahimci cewa Nijeriya ƙasa ce mai girma, mai ɗimbin al’adu da addinai, wadda ke samun cigaba a fannin tsaro da tattalin arziki.”
Ya bayyana cewa haɗin gwiwar ƙasashen biyu ya samar da jiragen yaki na Super Tucano da ake amfani da su wajen yaƙi da ’yan ta’adda, kuma nan gaba kaɗan ana sa ran ƙarin jirage masu sarrafa makamai za su iso ƙasar.
A ƙarshe, Idris ya tabbatar wa ’yan Nijeriya cewa gwamnati za ta ci gaba da kare rayuka da dukiyoyi.
“Nijeriya tana hannun aminci da shugabanci mai cike da ƙwarin gwiwa. Shugaba Tinubu na jagorantar tsaro, cigaban tattalin arziki da zaman lafiya mai ɗorewa, inji shi.”
