Dakarun Operation HAƊIN KAI sun kama wani ɗan ƙasar Sudan da ake zargi da kasancewa da alaƙa da ƙungiyoyin ta’addanci, tare da cafke wasu mutum uku da ake zargin masu haɗa kai ne da ƙungiyar ISWAP da kuma samar mata da kayan aiki a jihohin Borno da Yobe.
Rahotannin ayyukan soji da Kamfanin Dillancin Labarai na Najeriya (NAN) ya samu a ranar Litinin sun nuna cewa kamen ya biyo bayan sahihan bayanan sirri da suka kai ga gudanar da samame a wurare daban-daban na yankin Arewa maso Gabas.
A cewar rahoton, dakarun Bataliya ta 115 sun kama wani ɗan Sudan mai suna Musa Fashir, mai shekara 32, a yankin Lassa-Dille da ke ƙaramar hukumar Askira/Uba ta jihar Borno.
Binciken farko ya nuna cewa ana zargin Fashir na da alaƙa da wasu ƙungiyoyin ta’addanci, lamarin da ya ƙara nuna yiwuwar shigowar mayaƙan ƙasashen waje domin tallafa wa ayyukan ta’addanci a yankin.
Haka kuma, dakarun sun kama wata mata mai suna Mary Florence, mai shekara 36, wadda ta bayyana cewa ita baƙuwa ce daga ƙasar Ghana kuma ba ta da takardun izinin zama. Hukumomin tsaro sun ce ana ci gaba da bincike domin tabbatar da asalinta da kuma ko tana da wata alaƙa da ayyukan ta’addanci ko wasu laifuka.
A wani samame na daban, dakarun Brigade ta 27 tare da haɗin gwiwar Civilian Joint Task Force (CJTF) sun kama wani mutum da ake zargin mai haɗa kai ne da ƙungiyar ISWAP a yankin Shishiwaji da ke ƙaramar hukumar Gulani ta jihar Yobe.
Rahoton ya ce ana zargin mutumin na gudanar da haƙar ma’adinai ba bisa ƙa’ida ba, kuma yana da alaƙa da ISWAP. An kuma kama shi da wayoyin hannu guda uku.
Haka zalika, yayin sintirin kare manoma a yankin Kasabalari da ke ƙaramar hukumar Damboa ta jihar Borno, dakaru sun kama wasu mutum biyu da ake zargin suna samar wa ISWAP kayan aiki.
Kayan da aka ƙwato daga hannunsu sun haɗa da kekuna biyu, wayar hannu guda ɗaya, katin shaida, magungunan kashe ƙwari, magunguna, kayan gyaran keke, faifan ɗauko hasken rana (solar panel), fitilar hannu da kuma wuƙaƙe.
Jami’an sojin sun ce nasarorin da aka samu sun nuna muhimmancin amfani da bayanan sirri wajen daƙile shigowar mayaƙan ƙasashen waje, rushe hanyoyin samar wa ‘yan ta’adda kayan aiki da kuma karya cibiyoyin masu mara musu baya a yankin Arewa-Maso-Gabas.
