Babban Bankin Nijeriya (CBN) ya bayyana cewa ya buɗe asusun ajiyar kuɗaɗen waje guda biyu na ‘hukumar’ PFIPC wadda Matthew Adeyemi ya ƙirƙira ne bisa umurnin da ya samu daga Ofishin Akanta-Janar na Tarayya, ba bisa wata hulɗa kai-tsaye da ‘hukumar’ ba.
Daraktan Ayyukan Banki na CBN, Hamisu Ibrahim, ya bayyana hakan yayin da yake bayar da shaida a gaban Kwamitin Musamman na Majalisar Wakilai da ke binciken ayyukan PFIPC.
Ya ce CBN ya karɓi wasiƙar umurni mai kwanan wata 29 ga Yuli, 2025, daga Ofishin Akanta-Janar a ranar 30 ga Yuli, 2025, wadda ta ba shi izinin buɗe asusun dala da na fam sterling ga PFIPC.
Sai dai ya jaddada cewa duk da yake an buɗe asusun, ba a taɓa amfani da su ba, domin babu wani jami’in hukumar da ya gabatar da takardun izinin gudanar da asusun kamar yadda doka ta tanada. Saboda haka, asusun sun kasance ba su taɓa aiki ba, ba su da ko sisin kwabo a ciki, kuma ba a taɓa yin wata mu’amala ta kuɗi da su ba.
Hamisu Ibrahim ya bayyana cewa CBN ba ya buɗe ko rufe asusun wata ma’aikata kai-tsaye, duk irin waɗannan matakai sai ta hannun Ofishin Akanta-Janar na Tarayya.
Ya ce bayan buɗe asusun, ana sa ran hukumar ta gabatar da katin sa hannun masu izini, wasiƙun tabbatar da naɗin su, katin shaidar aiki, hotunan fasfo da sauran takardun da ake buƙata kafin a fara gudanar da asusun. Amma hakan bai taɓa faruwa ba.
A yayin binciken, an gano cewa PFIPC ta samu ware Naira biliyan 1.3 a kasafin kuɗin shekarar 2026, ta buɗe asusu a CBN, tana aiki daga wani ofishi a Babbar Sakatariyar Tarayya, kuma an yi iƙirarin cewa tana da ma’aikata 300.
Sai dai Shugabar Ma’aikatan Gwamnatin Tarayya, Didi Walson-Jack, ta musanta cewa ofishin ta ya tura ma’aikata zuwa PFIPC ko ya ba ita ‘hukumar’ ofishi.
Ta bayyana cewa ofishin da PFIPC ke amfani da shi a Babbar Sakatariyar Tarayya, mallakin Ofishin Sakataren Gwamnatin Tarayya (SGF) ne.
Ta ƙara da cewa a lokacin tantance buƙatar ma’aikata ta shekarar 2025, wata mata da ta gabatar da kanta a matsayin mataimakiyar darakta ta PFIPC ta nemi a amince da ma’aikata 300, kuma an amince da buƙatar tare da buƙatun wasu hukumomi. Amma hakan ba yana nufin an tura ma’aikata zuwa hukumar ba.
Walson-Jack ta ce yayin da ta duba takardun da aka gabatar daga baya, ta fahimci akwai matsala, saboda haka ta umurci a ƙara matakan tantance sahihancin takardu tare da sanya lauya cikin tsarin, duba da irin waɗannan bayanai domin hana sake faruwar irin wannan kuskure.
Tun da farko, Kakakin Majalisar Wakilai, Tajudeen Abbas, ya ce an kafa kwamitin binciken ne domin gano gaskiya kan matsayin PFIPC a doka, aikin ‘hukumar’, yadda ta samu shiga cikin kasafin kuɗi da kuma alaƙar ta da hukumomin gwamnati.
Ya jaddada cewa manufar binciken ba siyasa ba ce, illa tabbatar da gaskiya, ƙarfafa gaskiya da kuma tabbatar da ɗaukar alhaki a harkokin gwamnati.
Idan ba a manta ba, makonni biyu da suka gabata, wannan jarida ta buga labarin yadda ofishin Akanta-Janar ya wanke CBN daga duk wani zargi, inda ya tabbatar da cewa CBN bai ma kammala tsare-tsaren buɗe wa PFIPC asusu ba, saboda waɗanda ya kamata su sa hannu daga ‘hukumar’ ba su bayyana kan su ba.
