Gwamnatin Tarayya ta buɗe shirin rajistar kasuwanci kyauta ta Hukumar Rajistar Kamfanoni ta Ƙasa (Corporate Affairs Commission – CAC) ga ƙananan ‘yan kasuwa da masana’antu 250,000 a faɗin ƙasar nan, ƙarƙashin haɗin gwiwar Hukumar Bunƙasa Ƙananan da Matsakaitan Masana’antu ta Nijeriya (SMEDAN) da CAC.
Manufar shirin, wanda Shugaba Bola Ahmed Tinubu ya amince da shi, shi ne rage wa masu ƙananan sana’o’i nauyin kuɗin rajistar kasuwanci tare da ƙara shigar da su cikin tsarin kasuwanci na hukuma.
Masu cin gajiyar shirin za su samu rajistar Business Name a CAC ba tare da biyan kuɗin rajista ba, domin Gwamnatin Tarayya ce za ta ɗauki nauyin dukkan kuɗaɗen rajistar.
An bayyana ƙaddamar da shirin ne a yayin bikin karrama fitattun ƙananan, matsakaitan da manyan masana’antu (MSMEs) karo na takwas, wanda aka gudanar a Fadar Shugaban Ƙasa da ke Abuja a ranar 27 ga Yuni, 2026.
Baya ga rajistar CAC kyauta, waɗanda aka zaɓa za su kuma amfana da horaswa kan gudanar da kasuwanci, tallafin bunƙasa sana’o’i, da kuma samun damar shiga wasu shirye-shiryen da za su taimaka wajen faɗaɗa kasuwancin su.
Yadda ake neman shiga shirin
Masu kasuwancin da ke son cin gajiyar shirin su bi waɗannan matakai:
- Su shiga gidan yanar SMEDAN domin yin rajista: portal.smedan.gov.ng.
- Su buɗe sabon asusu ta hanyar cike sunan su, adireshin imel, lambar waya da kalmar sirri.
- Su cika bayanan kasuwancin su yadda ya kamata.
- Idan an tambaye su ko kasuwancin su na da lambar rajistar CAC, su zaɓi “No” idan ba su da ita.
- Su sake duba bayanan da suka cika domin tabbatar da daidaiton su kafin su tura buƙatar.
- Daga nan su jira saƙon tabbatarwa daga SMEDAN idan an amince da buƙatar su.
Haka kuma, waɗanda suka riga suka yi rajista a bayanan SMEDAN amma ba su da rajistar CAC na iya samun cancantar shiga shirin kai-tsaye.
SMEDAN za ta tuntuɓi duk wanda aka amince da shi domin sanar da shi matakan da zai bi wajen kammala rajistar Business Name kyauta a CAC.
Shirin ya biyo bayan yarjejeniyar haɗin gwiwa da CAC da SMEDAN suka ƙulla domin yi wa ƙananan sana’o’i da masana’antu 250,000 rajista a hukumance a faɗin Nijeriya.
A cewar Fadar Shugaban Ƙasa, manufar shirin ita ce rage wa ƙananan ‘yan kasuwa nauyin kuɗin rajista, tare da ba su damar shiga tsarin bankuna da sauran tsare-tsaren kasuwanci na hukuma, domin bunƙasa harkokin kasuwanci da ƙarfafa tattalin arzikin ƙasa.
