Mataimakin Shugaban Ƙasa Kashim Shettima a yau Laraba ya jagoranci tawagar Gwamnatin Tarayya zuwa gidan su Ministan Yanayi, Malam Balarabe Abbas Lawal, a Zariya, Jihar Kaduna, domin ta’aziyyar mahaifiyar su Ministan, Hajiya Ɗayyabatu Lawal, wadda ta rasu tana da shekaru 93.
Shugaban Ƙasa Bola Ahmed Tinubu ne ya tura tawagar domin ta yi gaisuwar ga Sarkin Zazzau, Alhaji Ahmed Nuhu Bamalli, da Ministan da ɗaukacin jama’ar Masarautar Zazzau.
A wurin gaisuwar, Shettima ya bayyana mutuwar Hajiya Ɗayyabatu da babban rashi da aka yi wa Nijeriya baki ɗaya.
Shettima ya yi addu’ar Allah ya jiƙan ta, kuma ya yi mata sakayya da gidan Aljannar Firdausi tare da ba Iyalin ta da dukkan jama’ar Masarautar Zazzau da Jihar Kaduna haƙurin jure wannan babban rashin.
