An ba da rahoton cewa an sake kama wani dillalin miyagun ƙwayoyi ɗan Nijeriya, mai suna Tony Obina, bayan ya tsere daga Babban Gidan Yarin Kakata da ke gundumar Margibi a ƙasar Laberiya.
An ce Obina yana cikin fursunonin da suka tsere daga gidan yarin ranar Lahadi, bayan tserewar da Ma’aikatar Shari’a ta Laberiya ta tabbatar.
Kafar yaɗa labarai ta West Trybe News Media ta wallafa bidiyon da ke nuna Obina da wani mutum ana mayar da su gidan yarin, bayan an ce mazauna yankin sun gano su. A cikin bidiyon, an ga Obina sanye da gajeren wando shuɗi kaɗai yayin da ake mayar da shi gidan gyaran halin.
Wannan ya biyo bayan tabbatar da tserewar da Ma’aikatar Shari’ar Laberiya ta yi a wata sanarwa da ta fitar jiya Lahadi, 20 ga Satumba, 2026.
Ma’aikatar ta ce wasu fursunoni sun tsere daga Babban Gidan Yarin Kakata, kuma Jami’an Tsaro na Haɗin Gwiwa na Laberiya sun ƙaddamar da aikin nemo su da sake cafke su.
“Ma’aikatar Shari’a tana sanar da jama’a cewa an yi tserewar gidan yari a Babban Gidan Yarin Kakata da ke gundumar Margibi, wanda ya haifar da tserewar wasu fursunoni daga wurin,” inji sanarwar.
Ta ƙara da cewa jami’an tsaro suna ci gaba da neman waɗanda suka tsere, yayin da Hukumar Gidajen Yari da Gyaran Hali take duba bayanan gidan yarin domin tantance ainihin adadin waɗanda suka tsere da kuma ko su wane ne.
Ma’aikatar ta ce za a fitar da sunaye da sauran bayanan waɗanda suka tsere bayan kammala tantancewa, domin taimaka wa hukumomin tsaro da jama’a wajen nemo su.
Ta roƙi mazauna yankin da su kasance masu sa ido, kuma su bayar da bayani kan inda fursunonin da suka tsere suke ga ofishin ‘yan sanda mafi kusa ko wasu hukumomin tsaro.
Sai dai ma’aikatar ta gargaɗi jama’a da kada su yi ƙoƙarin kama ko ɓoye ɗaya daga cikin waɗanda suka tsere da kan su.
Kwanan nan ne wani kwamitin alƙalai (juri) mai membobi 12 na Kotun Da’ira ta 13 da ke gundumar Margibi ya samu Obina da laifi a wata babbar shari’ar fataucin miyagun ƙwayoyi.
An samu Obina da laifi tare da wasu jami’ai biyu na Hukumar Yaƙi da Miyagun Ƙwayoyi ta Laberiya, wato Joe Logan da Lovette Flowers. An ce shari’ar ta shafi miyagun ƙwayoyi masu kimanin darajar dalar Amurka $181,008 da kuma fiye da dalar Laberiya miliyan 63.2.
Rahotanni sun ce al’ummar yankin da jami’an tsaro ne suka kama Obina da sauran waɗanda suka tsere yayin da ake zargin suna ƙoƙarin arcewa bayan fasa gidan yarin.
Ma’aikatar Shari’ar Laberiya ta ce Jami’an Tsaro na Haɗin Gwiwa za su ci gaba da bayar da sababbin bayanai yayin da ake ci gaba da ƙoƙarin sake kama sauran waɗanda suka tsere.
