Ministan Yaɗa Labarai da Wayar da Kan Jama’a, Mohammed Idris, tare da marigayi Shugaban Hukumar Kidaya ta Kasa (NPC), Alhaji Aminu Wushishi, lokacin wata ziyara a Abuja
Minista Idris ya yi jimamin rasuwar Shugaban Hukumar Ƙidaya, Aminu Wushishi
Ministan Yaɗa Labarai da Wayar da Kai, Mohammed Idris, ya bayyana matuƙar kaduwa da alhini kan rasuwar Shugaban Hukumar Ƙidaya ta Kasa (NPC), Dakta Aminu Yusuf Wushishi, Talban Wushishi.
A cikin wata sanarwa da Mataimakin sa na Musamman kan Harkokin Yaɗa Labarai, Rabi’u Ibrahim, ya fitar, Ministan ya ce: “Na samu labarin rasuwar Dakta Aminu Yusuf Wushishi cikin tsananin baƙin ciki. Rasuwar sa babban rashi ne ga Hukumar Kidaya ta Kasa, ma’aikatan gwamnati da ƙasa baki ɗaya.”
Idris ya bayyana marigayin a matsayin abokin sa na ƙut-da-ƙut kuma ma’aikacin gwamnati mai kishin ƙasa, wanda jajircewar sa wajen cigaban ƙasa ta bayyana a cikin ɗan gajeren lokacin da ya yi a hukumar.
Ya ce Dakta Wushishi ya fara aikin sa da kyakkyawar manufa ta gudanar da sahihiyar ƙidayar jama’a da gidaje wadda za a yi amfani da fasahar zamani wajen gudanar da ita, domin samar da ingantattun bayanai da za su taimaka wajen tsara manufofin ƙasa.
Ya ce wannan batu na daga cikin muhimman abubuwan da ya sanya a gaba tun bayan kama aikin sa.
“Shirin sa da jajircewar sa na gudanar da sahihiyar ƙidayar jama’a da za a yi amfani da fasahar zamani wajen gudanar da ita, sun nuna irin nauyin da yake ji na alhakin ƙasa da kuma ƙudirin da yake da shi na barin gagarumar gudunmawa mai ɗorewa ga ci gaban Najeriya,” inji shi.
Idris ya jajanta wa gwamnati da al’ummar Jihar Neja, da kuma ɗaukacin al’ummar Wushishi, inda marigayin ya riƙe babbar sarautar gargajiya ta Talban Wushishi.
Ministan ya miƙa ta’aziyyar sa ga iyalan marigayin, abokan aikin sa, abokan sa da ma’aikatan Hukumar Ƙidaya ta Kasa, yana addu’ar Allah ya ba su ƙarfin jure wannan babban rashi.
Ya roƙi Allah ya gafarta wa marigayin kurakuran sa, ya sanya shi cikin Aljannatul Firdausi, sannan ya ba duk waɗanda ke alhinin rasuwar sa haƙurin jure wannan babban rashi.
