Ƙaramin Ministan Tsaro, Dakta Mohammed Bello Matawalle, ya yi alƙawarin tara ƙuri’u miliyan 20 ga Shugaban Ƙasa Bola Ahmed Tinubu a zaɓen 2027 ta hanyar ƙungiyar sa ta Tinubu Again Movement.
Matawalle ya bayyana hakan ne a ranar Talata a Abuja, bayan ya dawo Nijeriya, inda magoya bayan jam’iyyar APC da membobin ƙungiyar tasa suka tarbe shi.
Ministan, wanda aka naɗa Mataimakin Daraktan Tsaro da Leƙen Asiri na I na Kwamitin Yaƙin Neman Zaɓen Shugaban Ƙasa na APC, ya ce ƙungiyar sa za ta mayar da hankali wajen tattara goyon baya ga Tinubu a faɗin jihohi 36 da Babban Birnin Tarayya Abuja.
Matawalle ya ce yana goyon bayan sake zaɓen Tinubu ne saboda abin da ya bayyana a matsayin nasarorin da gwamnatin ta samu a fannonin samar da ayyukan yi ga matasa, tsaro da bunƙasa tattalin arziki tun bayan hawan sa mulki.
Ya ce an kafa Tinubu Again Movement ne domin tallafa wa shirin gwamnatin Tinubu na Renewed Hope Agenda, tare da tabbatar da samun nasarar Shugaban Ƙasar a zaɓen 2027.
Ya bayyana ƙudirin sa na yin duk abin da zai iya domin cimma burin tara ƙuri’u miliyan 20 ga Tinubu.
Shugaban ƙasa na ƙungiyar na ƙasa, Auwal Abdullahi Aliyu, shi ma ya bayyana tabbacin sa kan sake zaɓen Tinubu, yana mai cewa membobi da magoya bayan ƙungiyar za su ƙara himma wajen wayar da kan jama’a da neman goyon baya ga Shugaban Ƙasar gabanin zaɓen 2027.
Ya ce ƙungiyar ta himmatu wajen ƙarfafa goyon bayan Tinubu tare da wayar da kan jama’a kan nasarorin da gwamnatin tasa ta samu a faɗin ƙasar nan.
