A ci gaba rangadin gangamin wayar da kai da Babban Bankin Nijeriya (CBN) ke yi a faɗin jihohi, bankin ya bayyana yadda hauhawar farashi ta ɗan ragu sakamakon tsauraran manufofin kuɗi da haɗaɗɗen tsarin canjin bai-ɗaya na kuɗin ƙasashen waje, tsakanin watan Yuni da Yuli na wannan shekara.
Gwamnan CBN Olayemi Cardoso ne ya bayyana haka, ta bakin Daraktar Riƙo a Sashen Sadarwa da Hulɗa da Masu Zuba Jari ta CBN, Hajiya Hakama Sidi-Ali.
Hakama ta bayyana hakan a ranar Alhamis yayin bikin ‘CBN Fair’ da aka gudanar a Lokoja, babban birnin Jihar Kogi.
An gudanar da taron ne ƙarƙashin taken: “Amfani da Hanyoyin Biyan Kuɗi na Zamani a Sinadaran Ƙara Yawan Mutanen da ke Amfani da Harkokin Kuɗi, Bunƙasa Tattalin Arziƙi da Hanzarta Ci gaban Ƙasa.”
Manufar wannan gangami ita ce jaddada muhimmancin haɗin gwiwar da ake buƙata domin samun daidaiton manufofin kuɗi, farashi da tsarin harkokin kuɗi.
A cewar Daraktar, bikin na daga cikin hanyoyin da CBN ya tsara domin hulɗa da jama’a da kuma wayar da su kan manufofi da shirye-shiryen bankin.
Ta ƙara da cewa, manufar bikin ita ce inganta ci gaba mai ɗorewa a tattalin arzikin ƙasa, tare da samar da damar jin ra’ayoyin masu ruwa da tsaki kan ƙarin hanyoyin inganta rayuwa da hanyoyin dogaro da kai ga ’yan Nijeriya.
Daraktar wadda Mista Zubairu Abdulrahman Salihu, Mai Kula da Reshen CBN na Lokoja, ya wakilta, ta bayyana cewa a ƙarƙashin jagorancin Olayemi Cardoso, shugabancin bankin ya ci gaba da tabbatar da daidaiton manufofin kuɗi da farashi, tare da gudanar da wasu muhimman ayyuka da suka fara haifar da sakamako mai kyau.
Hakama Sidi Ali ta ce raguwar hauhawar farashi, ci gaba da ƙaruwa da ajiyar kuɗaɗen waje da kuma daidaiton kasuwar canjin kuɗin waje a yanzu, na nuna cewa matakan da bankin ke ɗauka sun fara haifar da sakamako mai kyau.
Sai ta ce: “Sabbin bayanan Hukumar Kididdiga ta Ƙasa (NBS) sun nuna cewa hauhawar farashin kayayyaki gabaɗaya ta ɗan ragu daga kashi 15.91 a watan Yuni 2026 zuwa kashi 15.43 a watan Yuli 2026.
“Haka kuma, hauhawar farashin kayayyakin abinci da sauran kayayyaki na game-gari ta ragu a wannan lokaci, abin da ke nuna tasirin tsauraran manufofin kuɗi, haɗaɗɗen tsarin canjin kuɗin waje da kuma ingantaccen bayyanar bayanai a kasuwa.
“Naira na ci gaba da samun ƙarfi, yayin da tazarar da ke tsakanin farashin canjin hukuma da na kasuwar ‘yan canji ta ragu da kashi biyu. Ajiyar kuɗaɗen waje na Nijeriya na ci gaba da kasancewa sama da dala biliyan 52.5 na Amurka a watan Yuli 2026, abin da ya kai ta adadi mafi girma cikin shekaru 17, wanda da zarce hasashen shekara-shekara da CBN ya yi a baya.”
Saboda haka CBN ya yi kira ga ’yan Nijeriya da sauran mutane da su mutunta Naira tare da kiyaye tsaftar ta, tana mai jaddada cewa: “Kada a kekketa naira, kada a yi tallace-tallacen titi da ita, kada a lalata ta, kuma kada a buga jabun naira. Naira ta zamo kawai muhimmiyar alama ce ta ƙasa ba, har ila yau alfarmar mu ce ta bai-ɗaya a matsayin al’umma.”
Tun da farko, Mai Kula da Reshen CBN na Lokoja, wanda Mista Friday Abah ya wakilta, ya bayyana cewa Jihar Kogi tana cikin kyakkyawan matsayi na cin moriyar damar da harkokin kuɗi na zamani ke samarwa, kasancewar jihar wata babbar hanyar zirga-zirga da ta haɗa Arewacin Nijeriya da Kudancin ƙasar, tare da kasancewar ta cibiyar kasuwanci da ke tasowa.
Ya ce: “Don haka, ina ƙarfafa ’yan kasuwa, manoma, masu sana’o’i, ɗalibai, masu harkokin kasuwanci da sauran jama’a da su yi cikakken amfani da bayanai, nune-nunen ayyuka da tattaunawar da ake gudanarwa a yayin wannan taro.”
A nasa ɓangaren, Gwamnan Jihar Kogi, Ahmed Usman Ododo, ya bayyana ‘CBN Fair’ a matsayin wani abu da ya wuce tattaunawa kan fasahar banki ko hanyoyin biyan kuɗi, domin ya shafi jama’a da ci gaba.
Gwamnan ya yi alƙawarin tallafa wa shirye-shiryen da za su inganta ilimin jama’a kan harkokin kuɗi na zamani, faɗaɗa damar samun ayyukan kuɗi a yankunan karkara, bunƙasa ƙanana da matsakaitan masana’antu (MSMEs), samar da kuɗaɗen tallafin noma, ƙarfafa harkokin kasuwancin matasa, inganta mu’amalolin gwamnati ta hanyar dijital da kuma kare haƙƙin masu amfani da ayyukan kuɗi.
