Shugaban Ƙasa Bola Ahmed Tinubu ya yi kira ga Hukumar Zaɓe Mai Zaman Kan ta ta Ƙasa (INEC) da jami’an tsaro da su tabbatar da an gudanar da zaɓen gwamnan Jihar Osun cikin lumana da tsare gaskiya.
Al’ummar Jihar Osun za su fito rumfunan zaɓe a gobe Asabar, 15 ga Agusta 2026, domin zaɓen wanda zai jagoranci jihar, inda ‘yan takara 15 ke neman kujerar gwamnan.
Daga cikin ‘yan takarar akwai gwamnan jihar mai ci, Ademola Adeleke, na jam’iyyar PDP, da ɗan takarar jam’iyyar APC, Asiwaju Munirudeen Bola Oyebamiji, da kuma ɗan takarar jam’iyyar ADC, Honarabul Najeem Salaam.
Tinubu ya buƙaci masu zaɓe a jihar da su fito su gudanar da haƙƙin da ya rataya a wuyan su na ‘yan ƙasa cikin lumana, tare da guje wa duk wani abu da zai iya kawo cikas ga gudanar da zaɓen.
Ya ce INEC tana da alhakin tabbatar da cewa zaɓen ya gudana cikin tsari, gaskiya, ’yanci da adalci, yana mai buƙatar hukumar ta tabbatar da amincin tsarin zaɓen.
Shugaban Ƙasar ya ce zaɓen Osun shi ne na ƙarshe cikin zaɓukan da ake gudanarwa ba tare da haɗa su da sauran zaɓuka ba kafin babban zaɓen 2027, don haka ya kamata INEC ta yi amfani da shi wajen nuna wa ’yan Nijeriya shirin ta na gudanar da zaɓuka masu inganci.
Haka kuma Shugaban ya buƙaci Sufeto-Janar na ’Yan Sanda da shugabannin sauran hukumomin tsaro da ke cikin aikin zaɓen da su samar da cikakken tsaro a rumfunan zaɓe domin hana masu tayar da hankali kawo cikas ga tsarin.
Ya jaddada cewa dole ne a kare jami’an zaɓe da masu kaɗa ƙuri’a domin su gudanar da ayyukan su ba tare da tsoro ko barazana ba.
Shugaban ya buƙaci masu zaɓe da su fito da yawa domin zaɓar ɗan takarar da suke so, yana mai cewa an ɗauki matakan da suka dace domin tabbatar da gudanar da zaɓen cikin lumana, ’yanci da adalci.
Tinubu ya ce sakamakon zaɓen gwamnan Osun dole ne ya kasance abin da ya bayyana ra’ayin al’ummar jihar.
