Shugaban Ƙasa Bola Ahmed Tinubu ya buƙaci malaman addini a Nijeriya, Afrika da sauran sassa na duniya da su ci gaba da amfani da muryoyin su wajen yaƙi da ta’addanci, garkuwa da mutane da amfani da addini wajen haddasa kisa da tashin hankali.
Shugaban ya ce babu wata ibada ta gaskiya da za ta samu karɓuwa ta hanyar zubar da jinin mutanen da ba su ji ba, ba su gani ba.
Tinubu ya yi wannan kiran ne a yau Lahadi a Kano, cikin saƙon fatan alheri da Sakataren Gwamnatin Tarayya, Sanata George Akume, ya isar a madadin sa a wajen babban taron Mauludin Shehu Ahmad Al-Tijjani (RTA).
Ya ce malaman addini suna da muhimmiyar rawar da za su taka wajen wayar da kan matasa, koyar da zaman lafiya, ilimin addini da kyawawan ɗabi’u, tare da yin kira ga shugabannin siyasa da su gudanar da mulki bisa adalci da tausayi.
Shugaban Ƙasar ya ce ƙalubalen da duniya ke fuskanta, waɗanda suka haɗa da yaƙe-yaƙe, matsin tattalin arziki, yunwa, ta’addanci da rikice-rikicen da ake haddasawa da sunan addini ko ƙabilanci, sun ƙara tabbatar da muhimmancin rawar da shugabannin addini za su taka wajen samar da zaman lafiya.
A cewar sa, ɗariƙar Tijjaniyya, saboda faɗin hanyoyin sadarwar ta a Yammacin Afrika da Arewacin Afrika, tana da babbar dama wajen taimakawa wajen sasanta rikice-rikice, yaƙi da tsattsauran ra’ayi da kuma jagorantar matasa zuwa kyawawan ɗabi’u da tsarkin zuciya.
Tinubu ya bayyana Nijeriya a matsayin ƙasa mai matuƙar muhimmanci ga zaman lafiyar yankin, saboda matsayin ta a tsakanin Yammacin Afrika, yankin Sahel, Tafkin Chadi da Tekun Gini.
Ya tabbatar da cewa Gwamnatin Tarayya za ta ci gaba da kare ’yancin ’yan Nijeriya na gudanar da addinin su, tare da ƙarfafa haɗin gwiwa da malaman addini da sarakunan gargajiya domin tabbatar da zaman lafiya, haɗin kai da mutunta juna.
Shugaban ya kuma yi ta’aziyyar rasuwar marigayi Sheikh Ɗahiru Usman Bauchi, yana mai cewa rashin sa ya yi matuƙar tasiri a wajen taron.
Tinubu ya bayyana mariganyin a matsayin malami, uba kuma mai fafutukar zaman lafiya da kyakkyawar fahimta.
Ya ce hanya mafi kyau ta girmama Shehun ita ce a ci gaba da gadon ilimin Alƙur’ani da ya bari, tare da koyar da kyawawan ɗabi’u, bautar Allah, zaman lafiya da kuma kula da jin daɗin al’ummar da ya bari a baya.
