Gwamnan CBN, Cardoso da Okonjo-Iweala Za Su Jagoranci Tattaunawar Ƙarfafa Juriyar Tattalin Arzikin Afrika a Abuja

Daga Ashafa Murnai Barkiya

Gwamnan Babban Bankin Nijeriya (CBN), Olayemi Cardoso, da Darakta Janar ta Hukumar Kasuwanci ta Duniya (WTO), Dakta Ngozi Okonjo-Iweala, za su jagoranci muhimmin zama na musamman a Taron Africa Emerging Markets Forum (AEMF) karo na bakwai, wanda za a gudanar a Abuja a ranakun 29 da 30 ga Yuli, 2026.

A cewar wata sanarwa da CBN ya fitar ranar Lahadi, taron na kwanaki biyu zai gudana ne a hedikwatar bankin da ke Abuja, tare da haɗin gwiwar Emerging Markets Forum (EMF) da kuma Cibiyar Nazarin Tattalin Arzikin Afrika (CSEA).

An tsara taron ne domin haɗa masu tsara manufofi, gwamnonin manyan bankunan ƙasashe, ministoci, manyan jami’an gwamnati, shugabannin kamfanoni masu zaman kan su, masana tattalin arziki da abokan hulɗar ci gaba daga Afrika da sauran sassan duniya domin tattauna hanyoyin da nahiyar za ta ƙarfafa juriyar tattalin arzikin ta a yayin da duniya ke cigaba da fuskantar rashin tabbas.

Za a gudanar da taron ne ƙarƙashin taken “Gina Tattalin Arziki Mai Juriyar Fuskantar Ƙalubale da Sauye-sauyen Tattalin Arzikin Duniya.”

Sanarwar ta bayyana cewa tattaunawar da Cardoso da Okonjo-Iweala za su jagoranta za ta mayar da hankali kan yadda ƙasashen Afrika za su ƙarfafa juriyar tattalin arzikin su, ci gaba da aiwatar da sauye-sauyen tattalin arziki, zurfafa haɗin gwiwar kasuwanci tsakanin ƙasashen nahiyar da kuma samar da bunƙasar tattalin arziki mai ɗorewa duk da ƙalubalen da tattalin arzikin duniya ke fuskanta.

CBN ya ce zaman tarurrukan zai kuma duba manufofin da za su taimaka wa ƙasashe masu tasowa su jure wa girgizar tattalin arziki daga waje, tabbatar da daidaiton tattalin arziki da kuma ci gaba da sauye-sauyen da za su haɓaka cigaba.

Daga cikin waɗanda ake sa ran za su gabatar da muhimman jawabai akwai Ministan Kuɗi kuma Ministan Kula da Tattalin Arziki, Taiwo Oyedele, da Ministan Kimiyya, Fasaha da Ƙirkire-ƙirkire, Dakta Kingsley Udeh.

Masu shirya taron sun bayyana cewa halartar ministocin na nuna muhimmancin daidaita manufofin kuɗi, kasafin kuɗi da kuma manufofin kimiyya da ƙirkire-ƙirkire domin tabbatar da bunƙasar tattalin arzikin Afrika na dogon lokaci.

Sauran fitattun mahalarta taron sun haɗa da Babban Masanin Tattalin Arziki kuma Babban Mataimakin Shugaban Bankin Duniya mai kula da Tattalin Arziki da Ci Gaba, Indermit Gill; wanda ya kafa kuma Babban Jami’in Gudanarwa na Emerging Markets Forum, Harinder Kohli; da Mataimakin Shugaban Jami’ar Ahmadu Bello, Farfesa Adamu Ahmed.

Haka kuma, ana sa ran manyan jami’an gwamnati, masana, shugabannin kasuwanci da abokan hulɗar ci gaba daga sassa daban-daban na duniya za su halarci taron.

A cewar CBN, mahalarta za su tattauna batutuwa da suka haɗa da daidaiton tattalin arziki, haɗin gwiwar tattalin arziki tsakanin ƙasashen Afrika, tsarin biyan kuɗi tsakanin ƙasashe, fasahar kuɗi (FinTech), bunƙasa ababen more rayuwa, zuba jarin kai-tsaye daga ƙasashen waje (FDI), musayar fasaha, basirar wucin-gadi (AI), hauhawar farashin abinci, hauhawar farashi gaba ɗaya da kuma tasirin manufofin kuɗi musamman ga ƙasashe masu rauni ko masu farfaɗowa daga rikice-rikice.

Masu shirya taron sun ce manufar taron ita ce ƙarfafa tattaunawa tsakanin gwamnatoci, cibiyoyin kuɗi da abokan hulɗar ci gaba, tare da samar da shawarwari masu amfani da suka dace da buƙatun ƙasashe masu tasowa.

Sanarwar ta ce taron na da nufin ƙarfafa buɗaɗɗiyar tattaunawa kan manyan batutuwan da suka shafi ƙasashe masu tasowa, tare da samar da hanyoyin warware matsalolin tattalin arziki da za a iya daidaita su gwargwadon yanayin kowace ƙasa.

CBN ya ƙara da cewa taron wani ɓangare ne na ƙoƙarin bankin da abokan hulɗar sa na ƙarfafa haɗin gwiwa tsakanin ƙasashen yankin, inganta tsara manufofi bisa hujjoji da bayanai, da kuma haɓaka sababbin dabarun da za su ƙarfafa juriyar tattalin arzikin Afrika tare da tabbatar da bunƙasa mai ɗorewa.