A farkon watan Janairu na wannan shekara ta 2026, na bayyana muhimman nasarori har guda 20 da Babban Bankin Nijeriya (CBN) ya samu a cikin 2025, ƙarƙashin jagorancin Gwamnan CBN, Olayemi Cardoso. Yanzu kuma da 2026 ta zo tsakiya daidai, wato ƙarshen watan Juni, na yi ƙoƙarin fito da aƙalla nasarori 25 da CBN ya samu a cikin watanni shida kacal na wannan shekara:
1. Samun nasarar kammala Shirin Ƙarfafa Jarin Bankuna, wanda zuwa adadin jarin bankunan Nijeriya ya ƙaru da fiye da naira tiriliyan 4 a ƙarshen Maris, 2026.
2. Ɗaga darajar irin su Opay, Moniepoint, Palmpay zuwa cikakkun bankunan hadahadar kuɗi.
3. Tumbatsar asusun ajiyar kuɗaɗen waje zuwa dala biliyan 50.
4. Fito da tsarin magance yawan samun tangarɗa da matsalolin katin ATM da na’urorin ATM.
5. Yadda Tarayyar Turai (EU) ta bi sahun hukumar FATF, ta cire sunan Nijeriya cikin jerin ƙasashen da ke da hatsarin safarar kuɗi.
6. Kafa Kwamitin PSPC, wanda zai sa-ido kan tsarin biyan kuɗi ta hanyar fasahar zamani.
7. Batun kafa kwamitin sulhu domin warware rikice-rikicen masu taurin-bashi a bankuna.
8. Yadda CBN ya bankaɗo ‘yan damfara masu ƙoƙarin kutsen satar kuɗin ajiyar kwastomomin bankuna.
9. Gindaya sharuɗɗa kan BVN domin tsaurara matakan kare kuɗaɗen kwastomomi a bankuna.
10. Ci gaba da danne malejin hauhawar farashi domin hana shi cillawa sama.
11. Yabon da Shugaba Bola Tinubu ya yi wa Gwamnan CBN, Olayemi Cardoso, kan nasarorin sauye-sauyen tsarin kuɗi da shirin ƙarfafa yawan jarin bankuna.
12. Shan laƙani da dafa’i masu ƙarfin hana girgizar tattalin arzikin duniya yi wa Nijeriya barazana.
13. Ci gaba da gindaya ƙa’idoji da sharuɗɗan hana wasu bankuna raba ribar ƙarshen shekara-shekara, sanadiyyar ƙaƙudubar bashin naira tiriliyan 2.9 da suka bai wa Nestoil, bayan kamfanin ya kasa biyan kuɗin.
14. Gargaɗi da jan-kunne ga gwamnatocin jihohi tare da nuna masu illar ciwo bashin alaƙaƙai mai zame wa jihohi jangwangwama.
15. Ambaliyar masu zuba jari cikin Nijeriya, bayan sun yi amanna da nagartattun sauye-sauyen manufofin tattalin arziki da CBN ya bijiro da su.
16. Ƙaddamar da sabon kundin dokokin canjin kuɗaɗen waje.
17. Samun jinjina da ƙarin daraja daga S&P, kamfanin tantace daraja ko naƙasun manufofin kuɗi na ƙasashen duniya.
18. Ƙin amincewa da kiraye-kirayen komawa tsohon tsarin bayar da tallafin lamuni.
19. Shirin rage yawan takardun naira da ke hannun jama’a zuwa ƙasa da kashi 40 cikin 100, nan zuwa ƙarshen 2028.
20. Kafa wa bankuna sharaɗin riƙa bibiyar dalilin yadda kwastomomi ke tura kuɗaɗe daga asusun ajiyar su na kuɗaɗen waje.
21. Jinjina da yabon da Asusun Bada Lamuni na Duniya (IMF) ya yi wa CBN, sakamakon nasarar shirin ƙarfafa jarin bankuna.
22. Yadda CBN ya haskaka birnin Landan da duniya yayin da bankin ya lashe Kyautar Gwarzon Babban Banki na Shekara.
23. Fitar da sabbin ƙa’idojin bayar da lasisi da sa-ido kan kamfanonin rukunin harkokin kuɗi (HoldCos).
24. Saisaita gejin ribar rancen dare ɗaya biya washegari da sassafe a tsakanin bankuna (NOFR).
25. Gaggauta kulle asusun ajiya da kadarorin waɗanda gwamnatin tarayya ta zarge su da tallafa wa ta’addanci.
Tabbas, idan aka yi nazari da la’akari da waɗannan nasarori 25 na wannan shekara tun a watanni shidan farko, alamomi na ci gaba da nuna yadda CBN ke ƙara jajircewa wajen shiga gaba kan ingantawa da bunƙasa tattalin arziki, a matsayin sa na jagoran bunƙasa tattalin arziki da tsare-tsaren manufofin kuɗi a Nijeriya.
